Lafaek News-(Covalima)-Assosiasaun Klibur Dezenvolvimentu Sustentavel Timor-Oan (KDSTO) Munisipiu Covalima Segunda, (15/01/2024), apoiu nesesidade báziku ba ema ho defisiénsia nain 7 iha suku Beiseuk no Lalawa, postu administrative Tilomar, munisípiu Covalima.
Diretor Ezekutivu Klibur Dezenvolvimentu Sustentavel Timor Oan Munisipiu Covalima, Alfredo do Santos ba jornalista sira hatete, maluk defisiénsia nain hitu ne’e nessesáriu tebes ba KDSTO ho instituisaun relevante sira seluk bele fo tulun, ho razaun haree ba sira nia kondisaun moris ladun di’ak.
“Ha’u atu dehan bazeia ba iha semana kotuk ha’u mai vizita hodi hatene situasaun maluk difisiente sira nian iha suku rua ne’ebé mak iha ho postu ne’ebé hanesan iha Suku Ha’uk ho Lalawa, iha Aldeia Ai-Oan no Aldeia Wetaba, ha’u haree katak sira na’in 7 ne’e nesesariu duni atu ita apoia tanba atu dehan sira ne’e doubru no sira grave loos, lolos governu tenke haree ona saida mak ita bele halo no bele apoiu ba sira nune’e sira bele utiliza ka konsumu loro-loron,” katak diretor KDSTO, Alfredo do Santos ba jornalista sira iha suku ha’uk Segunda semana ne’e.
Alfredo haktuir, nia rasik rekoilla informasaun iha semana kotuk hodi halo negosiasaun ho parte relevantes sira hanesan CNR ho MSSSI munisípiu Covalima hodi fo apoiu ba maluk defisiénsia nain hitu ne’e.
“Ha’u mai rekolla tiha ha’u fila fali ba saida mak ha’u halo, iha momentu ne’eba ha’u mos komesa halo negosiasaun ho entidades relevante sira hanesan ho parte Centru Nasional Reabilitasaun, Ministeriu Solidariedade Sosial no Inkluzaun Munisipiu Covalima nune’e konkorda malu ho MSSI Covalima ita hetan apoiu sasan ne’ebé mak iha hanesan fo’os ho sasan sira seluk tan, apoiu ida ne’e hanesan apoiu imediatamente ba sira na’in 7 ne’ebé iha” informa Diretor KDSTO munisipiu Covalima Alfredo do Santos.
Iha sorin seluk, Marciana Moniz hanesan bin husi alin Difisiente Agrifino, sente haksolok tanba KDSTO ho ekipa bele fo apoiu nesesidade báziku ba defisiénsia Agrifino.
“Ami sente orgullu uitoan tanba ohin bele husi KDSTO, hanesan la barak, maibé sira suporta netik fo’os saku ida, maibé hakarak hato’o deit katak durante ne’e alin Agrifino han deit sun depois nia toba fatin mos la seguru tan ne’e hanesan familia difisiente hakarak husu ba governu katak karik ba oin ne’e atu kontinua fo apoiu karik haree mos kona ba ninia toba fatin no hahan liliu ba sun se lori foos mai pasiensia nia labele han” nia informa.
Entertantu maluk difisiente na’in iha Aldeia Ai-Oan no Wetaba maioria ho tipu difisiensia la hanesan balu iha difisiensia liman, balu matan, tanba ne’e tuir planu KDSTO Munisipiu Covalima katak semana oin sira na’in 7 sei hetan mos vizita husi Gabinete Prezidente repúblika nian.
Jornalista : Julio Salinas (RCCT)
Editor : Agapito de Deus
