Lafaek News—Country Director Asian Development Bank (ADB) Timor-Leste Resident Mission, Stefania Dina, ho Embaixada Nova Zelandia (NZ) iha Timor Leste, Enkargadu Embaixador, Nick Borthwick, hamutuk ho Diretor PERMATIL Ego Lemos, Kuarta (10/01/2024), vizita fatin restaurasaun bee iha aldeia Fatsuka suku Dare hodi haree programa kuda bee ne’ebé hala’o husi PERMATIL.
“Ohin ha’u lori sira la’o haree hodi hetan inspirasaun husi embaixada Nova-Zelandia ho ADB sira iha projetu lubuk ida iha Timor, tan ne’e hetan inspirasaun hodi projetu sira mai ne’e liu-liu mudansa klimátika bele integra restaurasaun bee ne’e ba sira nia programa ne’ebé maka liu husi sira nia vizita ohin,” Diretor PERMATIL Ego Lemos ba lafaek news iha Fatsuka Dare foin lalais.
Ego Lemos informa, ADB no Embaixador Nova-Zelandia apoiu ona livru ko-escolar ba PERMATIL, no sei apoiu fundus iha tinan 2024 ne’e , maibe liu husi UNICEF maka PERMATIL atu halo restaurasaun be’e iha aldeia Fatsuka hamutuk 75 no area Tohu-Meta.
“Be’e debu PERMATIL halo iha Fatsuka total hamutuk 23 no debun sira ne’e maioria be’e nakonu hotu kedas iha liur ne’e ita seidauk konta no agora kontenti tebes udan ben makas tebes akapta hotu iha ne’e ne’ebé komunidade sira tun ba kraik ne’e mos hakmatek loos, tamba rai la halai no erosaun mos menus no be’e debun sei fornese ba be’e matan sira ne’ebé besik nos mos fo han ba mota laran ba mos Aituri-Laran,” nia afirma.
Nia hateten, Kontinuasaun ba da-daun PERMATIL prepara ba iha fulan Agusto sei halo akampamentu, ho nune’e prosesu diskusaun ho komunidade no autoridade lokál sira la’o hela, atu bele prepara fatin ba akampa perma-youth nasional no perma-youth internasional iha Fatsuka.
“Atividades husi akampamentu maka atu fahe informasaun liu-liu ba akampa nasional atu haree progresu observasaun be’e ka restaurasaun be’e kada munisípiu depois fahe tékniku foun ruma más akampa ida internasional infelizmente ita hakarak fahe esperiénsia ba malu oinsá atu restaura hikas ita nia be’e no rai, no vizita ne’e ADB no Nova-Zelandia, husi saida maka sira esplika sira kontenti tebes sira agradese ba PERMATIL halo atividade ida impaktu di’ak signifikativu ba komunidade lokál iha area ida ne’e liu-liu liga ho ambiente,” Ego akresenta.
Iha sorin seluk, Country Director ADB iha Timor-Leste, Stefania Dina, haktuir agora dadaun ADB servisu hamutuk ho PERMATIL aplika konseitu permakultura iha ADB nia jardin ho kampaun iha ADB nia escritorio iha Farol, no mos oinsa bela aplika konseitu permakultura iha areas projetu kafe nian atu halo debun no oinsa atu konserva udan been ne’ebe se fo impaktu diak ba ai horis sira seluk no mos ba ambiente.
“Hanesan ohin ami hateten tiha ona relasiona ho servisu ne’ebe agora dadaun PERMATIL halo hela iha ADB kampaun iha Farol, ami espekta katak se bele hetan rejultadu diak. No mos bele sai hanesan pilotu ida nunee sira nebe mai halo vizita ADB kampaun atu halo enkontru, iha ne’eba sira bele haree rezultadu servisu iha jardin permakultura nian. Ami mos iha planu katak se konvida estudante balu bele mai iha ADB no sira bele haree, aprende no habelar informasaun nebe kapta husi konseitu pilotu Permakultura iha Jardin ADB. Relasiona ho projetu kafe nian, ami mos se servisu hamutuk ho maun Ego oinsa maun Ego se halo revista pratika ne’ebe agora da-daun projetu CALIP implementa no tuir mai oinsa bele aplika konseitu ou prinsipiu permakultura iha areas projetu kafe nian atu nunee bele hadia diak liutan implementasaun projetu kafe nian,” nia hakotu.
Ekipa kobertura : Lafaek News
Editor : Agapito de Deus
