Lafaek News—Asean Development Bank (ADB), Ministériu Negósius Estranjeiru no Kooperasaun (MNEK) no Trade Invest, organiza Program for Cluster IV of Capacity Building Programme- ASEAN Secretariat Technical Mission to Timor-Leste iha Timor Plaza Díli.
“Ita hotu-hotu akompaña konteudu hosi akordu Ekonómiku ASEAN nian ne’e kobre ho movimentu ema ho skill,” informa Visé-MNEK Milena Rangel iha Timor Plaza, Tersa-Feira, (09/01/2024).
Governante ne’e afirma, ohin mai ne’e deklaramente koalia kona-bá akordu servisu sira no mós investimentu, tan ne’e ohin prezensa ne’e hosi SERVE, Tred Invest, tanba sira mak sei hare akordu sira ne’e, no mós ministériu sira seluk mak hanesan Ministériu Agrikultura, MNEK no mós Ministériu Komérsiu Indústria (MCI).
Milena dehan, durante training programa ida ne’ebé bolu cluster ikus ona, cluster tolu ba haat, ne’e cluster ba akordu ekonómiku ne’ebé ohin finaliza ona antes adezaun ba ASEAN ne’e akontese, Tan ne’e foka liu ba investimentu no mós servisu ne’ebé sei hamutuk ho tékniku sira tenta atu introdús akordu sira ne’ebé mak ejiste iha ASEAN para bele responde ba enkuadramentu legais iha rai-laran.
“Ita akompaña katak ita-nia Primeiru Ministru Kay Rala Xanana Gusmão, anúnsia ona ba públiku liu-liu kuandu iha simeira iha Japaun, hatete katak ita Timor-Leste nia intensaun atu sai membru plenu iha 2025,” nia haktuir.
Milena Rangel hateten, dadaun ne’e tékniku sira halo preparasaun hotu para asegura adezaun iha 2025 ho lideransa Xanana Gusmão no mós PR José Ramos-Horta nian, ita dudu adezaun akontese iha 2025 nia laran, importansia hosi akordu ne’e rasik mak oinsá ita bele koñese didiak atividade iha ASEAN nia laran atu asegura ne’e mak asegura atividade ekonómika, oinsá atu asegura dezenvolvimentu TL nian ho enkuadramentu legál iha rai-laran para bele ita-nia sistema ho sistema ASEAN nian prioridade, atu nune’e bele ko’alia ba malu, nune’e ita bele asegura atividade ekonómiku.
Tuir nia katak, parte TL nian la kleur tan prosesu ne’e la’o kuandu simu ona roteiru, ita-nian halo hela ezersísiu iha ita-nia rai laran para asegura dezenvolvimentu, Dekretu-Lei balun para bele koresponde ba ezijénsia hosi akordu ekonómiku ne’ebé ejiste iha ASEAN.
Esperansa hosi atividade ne’e mak lori tékniku sira atu koñese diak liu tan kona-bá akordu ekonómiku ne’e, depois bele refleta mós iha ita0nia enkuadramentu legal doméstika nian.
Jornalista : Epifania I. Pinto
Editor : Agapito de Deus
