Lafaek News—Prezidente Repúblika, José Ramos-Horta hatoo parabens ba povu Timor Leste tomak ne’ebé hatudu hahalok di’ak loos iha durante selebrasaun natal no tinan foun la’o ho susesu.
Horta hatoo asuntu ne’e hafoin reuniaun dahuluk tinan 2024 nian ho Primeiru Ministru Xanana Gusmão iha palasiu prezidente Bairu-pité Dili hodi hala’o avaliasaun kona-ba situasaun seguransa iha rai laran perante selebrasaun natal no tinan foun.
Iha avaliasaun ne’e, Xefe Estadu hatoo parabens ba povu tomak, tanba hatudu komportamentu di’ak durante selebrasaun loron natál no tinan foun 2024.
“Ami nia observasaun liuhusi relatóriu husi polísia no autoridade sira seluk iha munisípiu no ami nia observasaun rasik buat hotu-hotu la’o di’ak tebe-tebes, situasaun seguransa kapás loos, komportamentu povu nian, joven sira nian di’ak tebe-tebes, ne’e duni fó parabens ba povu tomak ba joven sira no mós ba ita-nia F-FDTL ne’ebé kontribui para situasaun hakmatek durante periódu natál to’o fim do ano,” hateten Xefe Estadu, José Ramos-Horta, iha Palásiu Prezidensiál Bairo-Pite Díli, Kinta-Feira (04/01/2024).
Primeiru Ministru Kay Rala Xanana Gusmão hateten, situasaun seguransa la’o di’ak tebes, tanba impaktu husi juramentu ne’ebé membru PNTL ho F-FDTL halo, no rituál nahe biti boot iha Postu Bobonaro entre joven, grupu arte marsiál sira halo ona.
“Ha’u hatene katak imi hotu-hotu kontente, tanba ita husi natál mai to’o fim do ano kalma tebe-tebes, ida ne’e mak halo Xefe Estadu rasik temi dehan juramentu ne’ebé PNTL no F-FDTL halo ne’e influénsia tebes duni ba joven sira no mós iha 28 Dezembru Hauba no Karabau lian na’in sira hatuur hamutuk ho grupu arte marsiais sira iha ne’eba halo juramentu la’o kapás, Ne’e duni ita husu bo’ot atu klima ida ne’e, klima ida harmónia, klima ida paz, domin, bele la’o iha tinan 2024 tomak, atu ita bele preokupa ho buat ne’ebé ita atu halo ba rai ida ne’e,” katak Xanana Gusmão.
Jornalista : Epifania I. Pinto
Editor : Agapito de Deus
