Lafaek News—Prezidénsia Repúblika liu husi Diresaun Inkluzaun Sosiál, apoia nesessidade bázika hanesan pakote alimentasaun ba ema ho difisiénsia hamutuk na’in 150 husi Postu Administrativu Atabae, Maliana, Bobonaro, Lolotoe, Balibo, Cailaco.
“Apoiu nesessidade bázika ida-ne’e, Prezidente Repúblika Ramos-Horta nia domin ba ema ho difisiente sira, ida-ne’e la’òs atu rezolve nesessidade hotu-hotu, ida-ne’e lori mai bele apoiu netik ba loron ida ka rua nian, maibé, Prezidente-da-Repúblika hakarak promove buat ida inkluzaun sosiál,” hatete Asessór Prinsipál,”Asessór Prinsipal Assuntu Sosial Unidade Inkluzaun SosiálGaspar Afonso, hafoin distribui pakote alimentasaun hanesan fós, mina no seluk tan ba portadór difisiénsia sira iha Bobonaro foin lalais ne’e.
Assessor Gaspar fundamenta, konstituisaun RDTL artigu 21 fó garantia ba ema ho difisiénsia atu asesu ba edukasaun, no direitu seluk tan hodi bele kontribui ba dezenvolvimentu nasionál.
“Xefe Estadu, José Ramos-Horta, hakarak promove inkluzaun sosiál, liu-hosi kriasaun Unidade Inkluzaun Sosiál, hodi tau-matan ba ema ho difisiénsia”, tenik nia.
Iha Sorin seluk, Administradór Postu Administrativu Balibó, Amilcar Tavares, agradese ba Prezidente Repúblika, José Ramos-Horta, tanba bele fó ona apoiu nesessidade bázika ba ema ho difisiénsia.
“Gabinete Prezidente Repúblika ho fuan bo’ot, mezmu udan Estrada la di’ak, sira-nia domin boot ba rai ida-ne’e liu-liu ba ema difisiénsia. Sira iha Gabinete Prezidente nian tau-matan hela ba maun-alin sira difisiénsia,” dehan Administradór Postu Balibó ne’e.
Autoridade lokál ne’e, husu benefisiáriu sira atu labele haree kuantidade husi apoiu, maibé, hare husi atensaun ba ema ho difisiénsia, tanba barak mak seidauk asesu ba programa governu nian.
Nune’e mós, Reprezentante ema ho difisiénsia, Flávio Noronha, lori família no ema ho difisiénsia nia naran, agradese ba Prezidente Repúblika, José Ramos-Horta, tanba bele ajuda ona sira liu husi nesessidade bázika.
“Ha’u-nia oan Maria nian idade 28, ha’u sente kontente, maske la barak, maibé bele ajuda ona ami,” hatete Flávio.
Enkuantu iha komunikadu ne’e sita, kada Postu Administrativu iha benefisiáriu 25 ne’ebé kompostu husi ema ho difisiénsia fízika, matan, difikuldade halo komunikasaun no difisiénsia seluk.
Jornalista : Rita Moniz
Editór : Agapito de Deus
