Lafaek News—Prezidente Repúblika, José Ramos Horta, apresia modelu aprendizajen iha eskola Irmã Franciscana Missionária Nossa Senhora Laleia
“Ha’u mai vizita Madre Franciscana iha Laleia, sira apoiu ba edukasaun labarik hamutuk -180 ne’ebé madre sira hosi Portugál hetan apoiu fundus hosi Governu Portugál hodi konstrui uma para hanorin ita nia oan sira, agradese, tanba prosesu hanorin alunus sira, rejista pasu pozitivu hodi dezenvolve sistema edukasaun Timor-Leste liu-liu iha área Laleia, Baucau no fatin seluk bele lori oan sira ba aprende materia oin-oin”,Apresiasaun José Ramos-Horta, bainhira hala’o vizita xefe estadu iha eskola refere no observa prosesu aprendisajen no konstrusaun rezidénsia Irmã Franciscana iha Laleia foin lalais.
Rezidénsia ne’e harii iha rai kuaze ektare ida oferese hosi povu Laleia no proesu kontrusaun durante ne’e la’o hetan apoiu mós hosi Lider Istoriku, Kay Rala Xanana Gusmão no PR Ramos-Horta hodi konstrui durante tinan ida fulan haat, Ramos-Horta agradese, tanba prosesu hanorin alunus sira, rejista pasu pozitivu hodi dezenvolve sistema edukasaun Timor-Leste liu-liu iha área Laleia, Baucau no fatin seluk bele lori oan sira ba aprende materia oin-oin.
Iha fatin hanesan, Koordenadora Kongregasaun Irmã Franciscana Laleia, Madre Albina sente haksolok tebes ho vizita PR Ramos-Horta no Embaixadora Portugál hodi haree sira nia edifisiu no prosesu aprendijazen.
“Ami agradese ba vizita hosi senhor Prezidente Ramos-Horta hodi mai haree direita ami nia fatin no vizita estudante sira iha ne’e,” madre agradese.
Madre Albina deklara, edifisiu ne’e finaliza ona no sira hahú loke prosesu rejistu no hanorin estudante sira ho materia edukasaun oin-oin tuir kurikulu Portugál no Timor-Leste nian.
Edifísiu modernu kompostu hosi éjiu, sentru formasaun, kampu futsál, jardin halimar ba labarik no rezidénsia komunidade relijioza provinsía Portugueza, konstrui hosi Arquiteto Cesar Almeida hosi Empresa CC Construcões Portugál ho totál orsamentu kuaze milliaun $1.4
Durante halo observasaun, PR Ramos-Horta hetan esplikasaun direita hosi Arquiteto Cesar Almeida hodi introduz prosesu kontrusaun too finaliza obra ne’ebé tuir dezeñu hosi padre sira no kompañia ne’e mós harii ona barajen bee boot iha rai kuak ho kuantidade boot hodi akumula udan been atu utiliza iha tempu bai-loron hodi rega ai-funan no ai-horis sira ne’ebé sei kuda haleu rezidénsia iha foho leten Laleia matak nafatin.
Entretantu, tuir planu iha fulan Marsu no Abril tinan ne’e bele halo ona inagurasaun, bainhira kompaña finaliza ona prosesu konstrusaun no Vizita Xefe Estadu Ramos-Horta ne’e akompaña hosi Embaixadora Portugál ba Timor-Leste, Manuela Freitas Bairos no aesor polítiku Prezidente Repúblika, Tomas do Rosário Cabral.
Jornalista: Rita Moniz
Editór : AGapito de Deus
