Lafaek News—Prezidente Repúblika José Ramos-Horta husu Komponente Navál FALINTIL-Forsa Defeza Timor-Leste atu kontinua dezenvolve aan sai marineiru di’ak ho kultura tasi nian neebé metin oinsá komponente navál iha kapasidade halo manutensaun rasik ba ró.
“Nuudar imi-nia Komandante Supremu Forsa Armada, husu nafatin ba imi atu kontinua dezenvolve aan sai marineiru di’ak ho kultura tasi nian neebé metin, buka atu adapta tuir realidade no aprende ba dezafiu foun sira, liu-liu oinsá komponente navál sira tenke iha kapasidade atu halo manutensaun rasik ba ró sira”, dehan Prezidente Repúblika José Ramos-Horta iha nia diskursu iha selebrasaun loron aniversáriu Komponente Navál FALINTIL-Forsa Defeza Timor-Leste ba dala rua nulu resin ida (21) iha Hera Kinta (12/01/2023).
Tuir PR Horta, Tamba durante nee instituisaun Estadu sira hasoru problema boot mak manutensaun ba ekipamentus no viaturas.
“Problema no dejafiu sira neebé hasoru, presija iha investimentu hosi Estadu ba iha rekursus umanus, infraestruturas no ekipamentu adekuadu hodi fó biban ba Komponente Naval atu garante soberania iha tasi,” tenik Xefe Estadu Horta.
Entretantu Xefe Estadu ne’e mos lori estadu nian naran fo parabéns ba Chefe Estado Major General das F-FDTL, aniversáriu nee, husui atu ka’er metin nafatin doutrina navál nian hodi sai marineiru neebé ho kualidade di’ak atu halo misaun neebé estadu fó atu asegura soberania iha tasi no misaun iha nível rejionál no internasionál nian.
Jornalista : Rita Moniz
Editór : Agapito de Deus
