Lafaek News—Relasiona udan boot semana ne’e rezulta erosaun rai hanehan eskola baziku filial (EBF) suku Daudere postu administrativu Lautém munisípiu Lautém.
Xefe suku Daudere, Adérito Morais informa akontesimentu ne’e iha tuku 5 dadeer, kuarta (28/12/2022), oras ne’e da-daun komunidade inan-aman ne’ebé hela besik eskola refere evakua ona sasan eskola nian hanesan livru, kadeira meja, kuadru hakerek no seluk ba konserva provizoriu iha komunidade sira nia uma.
‘’Dader tuku lima udan iha postu Lautem halo rai monu no hanesan sala rua iha escola filial Aefala Suku daudere rejulta vidru rahun janela rahun no komunidade ho autoridade local evakua ona mobiliares escola nian rai iha komunidade nia uma,” katak xefe suku Daudere ba lafaek news via SMS facebook, kuarta (28/12/2022).
Iha akontesimentu ne’e, autoridade ne’e halo kontaktu kedan ho ba Instutu Jestaun Ekipamentus (IJE) ho administradór postu Lautém, maibé seidauk resposta ho razaun autoridade postu ne’e rasik ho pesoal IJE sei hala’o hela feiras natal hamutuk ho família sira iha ida-idak nia knua.
Ha’u mos kontaktu ona IJE no administrador postu hodi haree direita, maibé dehan sei feiras entaun seidauk hasai rai ne’ebe hanehan sala rua husi unidade ida ho sala tolu,” katak xefe suku husi Daudere ne’e.
Entretantu, konstrusaun eskola ne’e rasik hetan apoiu husi Povu Japaun ho Governu Timor Leste liu husi Ministériu Edukasaun no inagura iha tinan 2022.
Jornalista : Acacio Pinto
Editor : Agapito de Deus
