Lafaek News—Sesta, 23 Dezembru 2022- Gabinete Prezidensia Repúblika, hala’o distribuisaun aihan no prezente natal nian ba populasaun no estudante sira iha aldeia haat husi Suku Balibar Munisípiu Dili.
“Apoiu ida ne’e oferese hosi Avó Prezidente Ramos-Horta ba ama ferik sira inklui ita nia oan estudante sira iha munisipiu no mai mai iha Balibar hodi ama no oan sira bele kontente simu ita nia festa natál no tinan foun ho dame,” dehan Sekretariu Exekutivu Casa Sivil, Filomeno Romulo dos Santos Lay.
Distribuisaun aihan no prezente natál ho pakote 250 ba fahe direita hosi ekipa Gabinete Prezidente ba populasaun sira hosi Suku Balibar kompostu hosi Aleia Fatuloda, Lacoto, Tankae no Lorico Balibar, aihan no materia natál hanesan, livru lapijeira, regua no sasan seluk tan fahe populasaun no estudante sira hodi bele prepara aan selebra loron boot Natál 25 Dezembru 2022 no tinan foun 2023 ho dame.
Filomeno dehan, apoiu ne’e labele haree ba ninia valor, maibé destribuisaun ne’e hala’o iha teritoriu Timor-Leste no PR Ramos-Horta rasik halo ona natal ida ho tema “Natal Hamutuk ho Povu” ne’ebé hala’o ona iha resintu Palasiu Prezidensial iha loron, kinta-feira (22/12/22).
Iha fatin hanesan, populasaun no estudante sira hosi Suku Balibar nian hato’o agradese ba PR Ramos-Horta ne’ebé kontinua lolo liman no karin domin ba povu sira liu hosi fó apoiu aihan no material eskola nian.
Jornalista : Rita Moniz
Editór : Agapito de Deus
