Lafaek News—Prezidente Tribunál Rekursu (PTR) Deolindo dos Santos, informa Julgamentu movel ba da-daun suspende hela, tanba iha kestaun tékniku balun ne’ebé konsensu Tribunál sei haree fila-fali hodi organiza ho forma ne’ebé di’ak atu kontinua fali iha fulan Janeiru 2023.
Prezidente Tribunál Rekursu (PTR) Deolindo dos Santos hato’o asuntu ne’e bainhira hala’o enkontru ho Prezidente Repúblika José Ramos-Horta hodi informa servisu Tribunál Rekursu nia ne’ebé mak lao dadaun, iha Palasíu Presidensiál Bairo-pite Sesta (25/11/2022).
“Julgamentu movel ne’e agora suspende hela tanba iha kestaun tekniku balun ne’ebé mak konsensu Tribunál sei haree fila-fali para atu organiza ho forma ne’ebé mak di’ak liu-tan. Tanba ne’e mak suspende ona fulan haat ka neen ona”. Esplika PTR Deolindo dos Santos ba jornalista sira.
PTR Deolindo dehan Julgamentu movel ne’e suspende kuaze fulan haat ka neen ona maibé Konsellu organiza ona, atrávez deliversaun Konsellu aprova mós resolusaun balun ne’ebé mak sei implementa ba Tribunál movel ne’e.
“Konsellu mos hanoin ona katak ho aprovasaun sira ne’e Tribunál movel sei loke fali apartir de fulan Janeiru tinan oin,” katak PTR ne’e.
Entretantu tuir PTR Deolindo Espesifikamente Tribunál Rekursu Suai, Baucau, Dili mos bele Tribunál movel ne’e komesa fila-fali ba iha Munisípiu sira, hanoin ona atu komesa fali iha Janeiru nia laran bainhira regras sira ne’ebe mak Konsellu aprova ona komesa implementa ona hodi bele kontrola julgamentu movel ne’e di’ak liu-tan.
“Tanba julgamentu movel ne’e nia objetivu atu halo prosesu, tanba inan-aman sira la ba tanba dok, tanba moras ne’e mak ba iha ne’eba atu halo’ot prosesu ne’e iha ne’eba mais ho forma ne’ebé di’ak liu-tan”.
Jornalista : Rita Moniz
Editór : Agapito de Deus
