Pe.António Alves moris iha Díli, iha loron sanulu resin tolu (13) fulan Junho tinan 1933 (rihun ida atus sia tolunulu resin tolu) hosi Aman-Inan Sr. Có Coelin (aliás Silvério Alves) ho Sra. Josefina Marques Alves (aliás Maria Alves). Hosi ki’ik kedas Sr. Manuel Alves ho Sra. Alcídia Alves hakiak nia nudar oan, hamutuk ho senhora Constância Branco Alves.
Amu António Alves, mak segundo filho hosi Maun-Alin: George Co – residente iha Sidney, Austrália, Saudoso Sr. Domingos Lay Co Leong mate no hakoi iha Santa Cruz, Díli – Timor-Leste no saudosa Ildegarda Co nebé mate no hakoi iha Austrália.
Iha tinan 1946 wainhira completa ona tinan sanulu-resin-tolu hahú escola iha Colégio Soibada hodi ramata quarta classe iha tinan 1950 (rihun ida atus sia limanulu).
Hosi tinan 1950 to’o 1955 nia continua nia estudos iha Seminário Dare; hafoin continua ninia estudos iha Macau hodi ramata Filosofia no Teologia ho êxito. Depois termina nia estudos, nia fila mai Timor no simu ordenação sacerdotal iha loron 18/08/1963 (sanulu-resin-walu fulan Agosto tinan rihun ida atus sia nennuu-resin-tolu) hosi Rev.mo Bispo D. Jaime Garcia Goulart, Bispo Diocese Timor nian, iha Igreja Pró-Catedral Motael.
Uluk nana’in hetan colocação iha Dare hanesan Padre no mos hanesan Professor iha Seminário to’o tinan 1965.
Hosi tinan 1965 to’o 1972 foin-sa’e Pe.António Alves hetan knaar iha Igreja Sagrado Coração de Jesus, Becora, Díli (nudar pároco). Iha altura nebá mak nia harí Capela Hera; halo de’it ho du’ut no Ai-kabelak.
Hosi tinan 1972 to’o 1974, remata tiha licença graciosa iha Portugal, Pe. António hetan colocação nudar Pároco iha Ermera, Hosi tinan 1972 to’o 1975 hetan transferência ba Manatuto hodi hala’o knar nudar Vigário hamutuk ho Rev.do Padre Silva, Pároco missão iha tempo nebá.
Hanesan consequência Guerra Civil tinan 1975 nian, Pe. António Alves refugia ba Baucau hamutuk ho Rev.do, Pároco; tuir mai ema evacua sira ba Austrália hodi celebra iha rai-li’ur ninia Bodas de Prata (tinan ruanulu-resin-lima) sai Na’i-lulik. Iha Austrália, nia eleito hanesan Capelão ba refugiado Timor-oan sira iha tinan ruanulu-resin-lima nia laran hamutuk ho Pe. Júlio Aço. Iha Austrália mos Amu António serviço hamutuk ho Mary Makilop; Organização ne’e ohin presente no presta serviço iha rai doben ida ne’e graças ba Amu António Alves nia tulun.
Iha tinan 2000 simu Provisão hosi Ex.mo e Rev.mo D. Carlos Filipe Ximenes Belo, SDB iha altura nebá hanesan Bispo Díli nian, hodi halao knaar foun hanesan Pároco Paróquia Santo António Motael, Igreja nebé Nia hetan ordenação hanesan Na’i-Lulik iha tinan 1963 to’o momento celebra ninia Bodas de Ouro Sacerdotal iha loron 18 de Agosto tinan 2013 hodi halo lançamento da primeira pedra ba Paróquia Moteal nia atual Altar Externo.
Hanesan Pároco, nia mak halo reabilitação dahuluk ba Igreja paroquial ne’e iha tinan 2010 ho fundos hosi Governo. Hosi ninia cooperação ho Igreja balu iha Austrália, Padre António Alves mos hetan fundos hosi Paróquia Waga-Waga hodi halo pavimentação recinto Igreja nian hodi hamaran bé nebé nalihun iha fatin hotu-hotu wainhira udan; hodi buka contribuição fós no produtos primeiras necessidades balu ba ema vulnerável sira, inclui Opa Mean no pessoal da limpeza; no seluk seluk tan.
Infelizmente, tan moras, Padre António Alves dala barak ba halo tratamento cardiologia nian iha Austrália maibé sempre hanoin no fila fali mai serbi Kreda Timor no sarani Paróquia Motael.
Iha Fevereiro de 2014, Padre António hetan moras nebé maka’as; nune’e família lori nia ba consulta hodi hetan tratamento médico iha HNGV. Wainhira alta hosi hospital, no hela iha feton Dona Constância nia uma, nia memória mos fraca hodi toba la dukur; tur la hakmatek; nune’e família resolve lori nia ba halo tratamento iha Sidney, Austrália.
Lori tiha ba Austrália iha Fevereiro de 2014, Amu António la fila fali mai Timor; depois de consulta médica, Amu António hela ho nia Maun George Co maibé tan nia maun mos memória hahú fraca mak madre sira lori nia ba tau iha Uma Katuas sira nian atu bele hetan tratamento contínuo to’o hakotu i’is iha loron 10 fulan Outubro tinan 2022 iha Austrália. Pe.António Alves nia isin mate lori fila mai Dili iha loron 24 de Outubro 2022, horas tuku.14.30, simu iha Aeroporto Internacional Nicolau Lobato Dili. Hafoin translada kedas mai iha Paróquia Motael hodi continua ho Missa no veladas.
Ohin loron 25 Outubro 2022, ita hotu hamutuk iha fatin ida ne’e hodi agradece ba ninia didicação, domin, sacrificio esforço hodi servi sarani Timor liliu Paróquia Motael, ita harohan ba nia atu Nai Maromak perdua nia salan hanesan ema no husu mos Nai nia misericórdia ba Nia iha fatin hakmatek rohan Laek Lalehan…Obrigado Amo António Alves ba domin no sacrificio nebé halo ona ba Kreda Timor-liuliu iha Arquidiocese de Dili…..Adeus—Harohan nafatin mai ami hotu nebé sei lao hela iha mundo ne’e.
Motael, 25 de Outubro de 2022
