Lafaek News—Monumentu memorial Balibo Five nu’udar realidade istorial husi pasadu nian kuda sasin iha prezente hodi Timor-oan tomak hahi iha ohin no ba futuru iha jardin sidade liberdade imprensa postu administrativu Balibo, munisipiu Bobonaro
Realidade ida ne’ebé hamosu faktus istoriál atu kuda firmeja iha jornalista ida-idak fuan atu kontinua luta ba lia los tuir dalan mane klosan nain liman husi Australianu (jornalistas) oferese sira isin, ran suli nadodon hodi marka an iha rai Balibo ho letra lulik kóres osan-mean Australia ikus ho identidade Balibo Five, ohin loron hamosu ona sinal lulik ida ho abut metin bei-beik mak monumentu memoral Liberdade Balibo Five.
Membru konselleru Centru Nasionál Chega (CNC), Sisto dos Santos iha nia diskursu hafoin lansamentu memorial liberdade fatuk dahuluk iha Balibo Five, haklalen ohin hanai hikas tinan 47 liuba ho simbólika hatur sinal lulik nu’udar sasin ba sofrimentu lia loos.
“Ohin tinan 47 ita simbólikamente hatur sinais ida nu’udar sasin ba sakrifisiu no sofrimentu lia loos,” katak Sisto dos Santos iha sesaun lansamentu monumentu trajedia Balibo five iha Balibo domingu semana ne’e.
Monumentu memorial da liberdade sai sasin ida ba pasadu no ba futuru hodi kontinua Timor-oan sira ninia solidariedade ho sobrevivente no ema hotu ne’ebé da-daun ne’e goja Liberdade ne’e.
“Solidaridade povu Timor no ita nia belun sira iha Australia, Novazelandia no ba maluk hotu ne’ebé mak hamrok ba lialoos maibé lakon sira nia vida ba rai ida ne’e, momentu ida ne’e atu dedika sira,” katak membru konsellu CNC ne’e.
Sisto katak, husi monumentu ida ne’e hodi asegura sofrimentu ida ne’ebé akontese iha pasadu atu garante katak sei la akontese tan iha Timor no mos iha rai seluk.
“Memorial ida ne’e laos de’it ba ita nia Jornalistia na’in lima, Maibé sidadaun sira ne’ebé mak lakon sira nia vida no maluk funeravel sira ba oin husi monumetu memorial ida ne’e ba oin mensajen ida ne’e sei la hamate ba oin no liliu ba jerasaun foun sira,” Sisto sublina.
Iha fatin hanesan Ministru Prezidénsial Konsellu Ministru, Fidelis Manuel Leite Magalhães reafirma, monumentu ne’e mos la reprezentante de’it maluk jornalista na’in 5 ne’ebé mate tanba hetan oho husi militar Indonésia, maibé reprezenta ema hotu ne’ebé fo vida ba rai ida ne’e.
“Monumento ne’e sai memória ba futuru, atu sai Referénsia atu hare fila fali ba pasadu hanesan lisaun ka aliserse ba futuru atu hakat ba oin,” dehan governante ne’e.
Entretantu iha lansamentu monumentu memorial liberdade fatuk dahuluk ne’e partisipa husi Vise Ministru Administrasaun Estatal, Lino Torezão, Ministru Prezidénsial Konsellu Ministru Fidelis Manuel Leite Magalhães, Presidente Konsellu imprensa Virgílio da Silva Guterres konseleiru sentru Nasionál Chega Sisto dos Santos, Presidente Autoridade Munisípiu Bobonaro no autoridade lokal postu administrativu Balibo, komunidade sira husi postu administrativu Balibo, no Jornalista husi media nasional hotu.
Jornalistia: Rita Moniz
Editór : Agapito de Deus
