Lafaek News—Faluk Armanda de Jesus idade 62, husi Lugululi postu administrativu Kailako, munisípiu Bobonaru, moris iha kondisaun tristeza loron ba loron moris nakonu difikuldade nesesidade uma-laran.
Dalaruma tuur mesak hodi reflete situasaun ne’ebé liu ona ba kotuk, faluk sempre hanoin lia-fuan hirak ne’ebé lider polítika sira ko’alia iha palku leten katak nasaun liberta ona, maibé povu seidauk liberta husi kiak ho mukit, atu liberta povu ida ne’e tenke hahú agora ba oin, maibé realidade povu fo tiha lejitimidade husi poder nain haluha tiha lia-fuan iha palku leten no fila kotuk ba ema sira ne’ebé nain ba podér.
“ Ha’u lamenta ho nain ulun sira nia promete iha tempu kampaña ko’alia lia-fuan mesak midar de’it, maibé sira hetan tiha kadeira la hanoin povu kiik ne’ebé moris iha terus nia laran, ha’u sente tristi teb-tebes,” kata kina faluk Armanda de Jesus ba lafaek News iha Lugululi Bobonaro, segunda (19/09/2022).
Faluk Armanda laiha oan, moris mesak hela iha uma simples ne’ebé didin ho kalen no laiha eletrisidade atu haroman netik iha tempu kalan, faluk ne’e hanoin atu fila-liman (negosiu), maibé sente forsa finanseira la sufisiente, tanba osan idozus nian simu tarde no montante kiik tebes.
“ Timor ukun an tinan rua-nulu ba leten ona, maibé ukun nain sira la tau matan ba sira nia povu ki’ik sira, -povu nafatin moris ki’ak ba bei-beik too tempu kampaña sira ko’alia kona ba inan faluk sira, sira dehan inan faluk sira kada fulan ida simu $ 20.00 USD, maibé ate agora ami faluk sira la hetan bu’at ida husi ukun nain sira nia promete,” katak inan faluk Armanda.
Hodi dehan, husu nain ulun sira atu bhalo reflesaun tanba tempu kampaña ba eleisaun parlamentár nian besik-da-daun ona, husu atu hatudu netik realidade ba povu kiik sira labele tula bei-beik esperansa ba povu kiik hodi laran metin loron-kalan too laiha asaun real.
“Ha’u senti tristi tbes ha’u hanesan faluk ida, ha’u atu halo saida no ha’u atu husu ba se ha’u ferik ona ha’u atu fa’an saida mak hodi hetan osan maibé ha’u hein de’it mak osan idozu nian, bainhira ha’u osan laiha ha’u fa’an de’it animal sira hanesan fahi ho manu, fahi dalaruma fa’an fo folin 60.00 too 80. Dolar hodi sustenta ha’u nian an rasik,”nia hakotu
Lian tatoli husi faluk Armanda rai ne’e lulik, povu barak terus hodi sosa liberdade, maibé liberdade ne’e labele ema uituan de’it mak goza, loke netik dalan liberdade moris dignu nian ba povu kiik ne’ebé moris iha areas remotas atu sente mos liberdade husi ukun rasik an nian ne’ebé lori povu nia kosar-ben mak sosa hodi hakerek testu lulik Repúblika Demokrátika de Timor Leste.
Entretantu. jornalista lafaek news tenta konfirma ho autoridade lokal hanesan xefe aldeia ho xefe suku Lugululi postu administrativu Kailako, maibe la konsege resposta kona-ba preukupasaun inan-faluk Armanda de Jesus nia preukupasaun, tanba autoridade lokal area refere preukupadu hela ho servisu.
Estajiada: Adolfina soares
Editor : Agapito de Deus
