Lafaek News-Dili, 21 setembru 2022-Prezidente Repúblika, José Ramos-Horta, ho delegasaun kuarta-feira ne’e, desloka ona ba Nova Iorke hodi partisipa iha Assembleia Jerál Organizasaun Nasoens Unidas (ONU) nian ba dala-77.
Iha enkontru asembleia jerál ONU ba dala-77 ne’e, Prezidente Repúblika, José Ramos-Horta, mós sei hato’o diskursu estadu Timor-Leste nian, tuir Xefe Estadu, sei ko’alia assuntu nasionál no sei sai hanesan relatoriu ne’ebé pozitivu ba komunidade internasionál kona-ba situasaun iha Timor-Leste.
“Mais ha’u nu’udar Xefe-de-Estadu, ha’u la ko’alia lori ha’u-nia naran pessoál, ha’u lori naran estadu nian, entaun ha’u-nia diskursu kuaze bele hatete, relatóriu ida Timor-Leste nian ba komunidade internasionál kona-ba progressu ké Timor-Leste halo iha páz iha seguransa iha rai laran, iha toleránsia polítika, toleránsia rekonsiliasaun Timor-Leste nian ké ita rai ida segundu maiór paíz katóliku iha mundu ho minoria musulmanu no protestante, maibé relasaun ho komunidade sira seluk di’ak teb-tebes, laiha konflitu relijiózu, laiha konflitu étniku, ne’e relatóriu ida di’ak ba mundu,” informa Prezidente Horta.
Ba Xefe Estadu, Assembleia Jerál sei ko’alia mós kona-ba situasaun iha Ukránia ne’ebé iha fó impaktu ba mundu, adezaun Timor-Leste ba ASEAN, Organizasaun Mundiál Komérsiu (OMK), susesu Timor-Leste iha mitigasaun no kombate ba pandemia covid-19 no seluk tan.
Durante iha Nova Iorke, Xefe Estadu mós sei hala’o enkontru bilateral ho Primeira-Ministra Nova Zelándia, Jacinta Ardern, Primeiru-Ministru Kambodia, Hun Sen, Prezidente Kosovo no juíz hosi tribunal anti-korrupsaun internasionál, Juíz Mark Wolf.
Enkontru ho Senadór Patrick Dodson, enviadu espesiál ba rekonsiliasaun no implementasaun kona-ba deklarasaun Uluru hodi fuan, no partisipa mós iha simeira altu-nível g7+ nian.
Entretantu, Xefe Estadu ho delegasaun, sei fila hikas mai Timor-Leste, iha loron 27 setembru 2022.
Jornalista : Rita Moniz
Editor : Agapito de Deus
