Lafaek News—Inan faluk Edvijes mehi hakarak muda moris oan sira nian iha futuru, hahú husi hanoin ne’e mak motiva faluk tenke ba tuur iha merkadu Taibessi fan produtu local hetan osan hodi sustenta nesesidade uma laran nomos selu oan sira nia eskola.
Maske nune’e, inan faluk Edvijes la hatene hakerek maibé nia hakerek iha fuan katak mudansa ba moris iha loron naruk nian mak eskola, matenek atu halo mudansa iha uma laran no mudansa mos ba nasaun, hanoin ida ne’e hanesan osan-mean ne’ebé sempre kuda iha faluk Edivs nia fuan, maibé la’os fasil hanesan mehi, presiza funu hasoru turbulénsias oi-oin ne’ebé tenta imepede iha atividades moris nian, tanba oan sira nia estudu importante liu buat hotu.
Ha’u lor-loron fa’an mak produtu lokál sira hodi hetan osan no sustenta ha’u nia familia uma laran no selu mos oan sira nia estudu tanba ha’u nia oan sira nia estudu ne’e importante tebes ba sira nia moris lor- loron,”Hateten Edvijes da silva ba jornalista Lafaek News iha merkadu Manleuana Dili, kinta (07-08-2022).
Inan faluk ne’e hatutan katak, produtu lokál ne’ebé mak nia fa’an nia sosa tutan fali hodi fa’an, hanesan fehuk, tomate, liis mutin, ai-lia ho tan abukate, produto lokál ne’ebé fa’an ho folin hanesan, fehuk abukate tomate no seluk tan ho folin $ 15.00, maibé fa’an fali, fehuk ho abukate butuk ida ho folin $ 1.00 dollar maibé tomate, liis, ai-lia butuk ida $ 0.50 sen, karik ema sosa loron ida hetan $ 15-$20. dalaruma loron ida hetan de’it mak $ 6.00, ne’e mos agradese tanba oan sira nia osan mikrolete nian iha ona.
Ha’u hanesan inan faluk ida ba ha’u nia oan sira ha’u tenke buka rasik osan hodi nune’e bele sustenta oan sira nia estudu tanba sira nia estudu ne’e importante duni ba sira,ina faluk ne’e husi municipio viqueque,post administrativu ossu no oan nain 7, mane 3 no feto 4, nain lima 5, forma ona uma kain, hela feto 1 ho mane 1 mak agora dadaun ne’e sei kontinua hela sira nia estudu iha Universidade Nasional Timor Loro sa’e UNTL,” katak inan faluk ne’e.
Tuir faluk ne’e katak, dader sedu rona balada fuik sira hananu no manu kokorek hafanu ona nia husi toba fatin, husi ne’e prepara matabixu dadeer hodi hola netik tahan estomuk, hafoin hakat ona husi uma ba merkadu Taibessi, hodi hadau malu sosa produtu lokál ne’ebé maluk negosiante sira lori husi munisípiu Aileu, Ainaro, Ermera, Baukau ho Bobonaru, hafoin fan fila-fali, bainhira too kalan fila ba uma deskansa atu bele kontinua iha loron tuir mai.
Buka osan ne’e tenke pasiénsia, maibé tenke badinas, tanba ita tenke halo servisu maka’as hodi buka osan hadia ita nia moris no prepara oan sira nia futuru hahú husi agora, sira matenek sei serbi ba ita rain ne’e diak, ema la matenek ita nia nasaun mos la hakmatek,” mensajen ikus husi inan faluk ne’e ba lafaek news iha merkadu Manleuana
Estajiada : Adolfina soares
Editor : Agapito de Deus
