Lafaek News-Seremónia resesaun no missa agradesimentu ba Kardeál primeiru Timorense Arsebispu Arquedioseze Metropolitana Dili Dom Virgílio do Carmo da Silva, parte governu ho Conferensia Episkopal Timorense( CET) prepara osan ho montante $220 mill.
Asuntu ne’e hatoo husi presidente Komisaun Organizadora Komferensia Episkopal Timorense (CET) Pe.Guilhermino da Silva hafoin remata enkontru ho Prezidente Repúblika José Ramos Horta iha Palásiu Prezidensiál bairo-pite Sesta semana ne’e.
Ami husi komisaun konjunta, seremónia resesaun no missa agradesimentu ba Kardiál primeiru Timorense ninian ne’ebé sei realiza iha 5 to’o 6, Osan mai husi Konferensia episkopal Timorense nian no mós apoiu husi governu ho montante $220 mill liu ne’ebé komisaun konjunta ne’e iha,” Pe.Guilhermino da Silva iha Palásiu Prezidensiál bairo-pite Sesta ( 26/08/2022).
Pe.Guilhermino dehan, Nu’udar Komisaun Organizadora mai hato’o ba Xefe estadu sekunsia ba seremónia loron rua ninian, aumezmu tempu konvida Xefe Estadu, tanba ida ne’e onra boot ida ba povu no nasaun Timor, tanba foin primeiravez Vatikanu bele foti Timoroan ida ba Kardiál.
Kardiál ne’e hanesan pozisaun ida, iha uma kreda Katólika ninian, no nia servisu hamutuk ho Papa iha Vatikanu, parte ida ne’e la signifika Arsebispu Dom Virgílio sai ona Kardiál no husi Timor, Bispu nafatin, hanesan Kardiál no hela iha Timor, servisu iha Timor”, esplika Pe.Guilhermino ba jornalista sira.
Pe.Guilhermino esplika, Laiha atividaade seluk, só resesaun iha loron 5 dader sarani hotu sei ba aeroportu internasional Nicolao Lobato atu simu Kardial Timor Leste Dom Virgilio do Carmo ne’ebé foin fila husi Vatikanu.
Ba seremónia rua ne’e, ami komisaun konjunta ne’ebé forma husi Igreja no parte governu halo ona servisu balun iha terenu, tantu iha tasi tolu fatin seremónia no mós iha parte administrasaun liga ho konvite sira, Iha planu komisaun nian, sei konvida mós Bispu sira iha nasaun viziñu sira hanesan Darwin, Atambua, no Kupang, se sira iha posibilidade bele mai partisipa iha missa agradesimentu ba Kardiál primeiru Timorense nian,” katak prezidente KO ne’e.
Prezidente KO ne’e reafirma tan, kona-ba preparasaun hahú halo tiha ona loron 15 Agostu no kuaze pursentu 70 komisaun halo tiha ona preparasaun sira, liu-liu iha Tasi tolu ba fatin atu missa, prepara tenda, preparasaun mós tollet movel no hadia kanalizasaun bee inklui taka rai kiak iha fatin seremónia.
Iha biban ne’e Prezidente Repúblika José Ramos Horta kompromete ba komisaun Organizasaun CET disponivel no kontente loos, atu partisipa iha seremónia resesaun iha Aeroportu no mós missa agradesimentu Tasi-Tolu, entretantu tuir oráriu Kardiál primeiru Timorense ne’e to’o iha Timor Leste, iha loron 5 tuku 6 dader ho aviaun Aero Atlántiku tuun (landing) iha Aeroportu internasionl Nicolao Lobato.
Jornalista : Rita Moniz
Editór : Agapito de Deus
