Lafaek News—Estrada diresaun postu administrativu Tilomar liga post administrativu Fatumea kondisaun la diak atu fasilita movimentasaun transportes públiku tula pordutus lokál ba merkadu merkadu Kovalima.
Xefe Suku Belulik Leten, José Quintinho Amaral informa iha tempu bai loron komunidade bele halo movimentu uza transporte di’ak uitoan maske estrada kuak barak, maibé bainhira iha tempu udan susar tebes ba komunidade sira husi postu Fatumea tun ba iha Tilomar liu ba Suai-vila.
Ita haree estrada ne’ebé ligasaun husi Tilomar mai to’o iha Fatumea maioria at hotu kuandu ema ne’ebé lori kareta sa’e mai to’o Fatumea tenki kondotor ne’ebé iha expriensia duni, iha tempu bai loro mos kareta liu araska uitoan, satan udan ne’e at liu tan atu halo movimentu,”José Quintinho Amaral halore lia ne’e ba Jornalista sira iha nia knu’uk, Belulik Leten, Postu Administrativu Fatumea, Munisipiu Kovalima, Tersa semana ne’e.
Autoridade komunitariu ne’e haktuir alternativu seluk ne’ebé uza hodi halo movimentu ba mai entre Fatumea ho Suai bele liu husi suku Fatumea ba Suku Dato Rua, postu administrativu Fohorem foin tun ba kruzamentu Tilomar, maibé dalan at hanesan de’it kuandu udan ona labele liu tanba kondisaun dalan la di’ak.
Xefe Suku Belulik Leten esplika, foin lalais nia parte hato’o ona pedidu ba Ministeriu Obras Publika (MOP) liu husi Institutu Jestaun Ekipamentu (IJE), tuir informasaun katak hetan ona despaisu husi MOP, maibé to’o ohin loron seidauk iha rezultadu estrada sei kontinua at nafatin ne’e.
Ami hato’o ona karta ba Ministru Obras Publiku ba IGE atu halo normalizasaun ba estrada mai Fatumea, maibé to’o oras ne’e seidauk iha rezultadu nafatin, entaun estrada mos kontinua at nafatin” Tenik nia.
Xefe Suku ne’e kontinua husu ba governu sentral liu-liu MOP atu foti medida urjénsia ba Estrada refere, tanba nudar lider komunitária husu bei-beik ona verbalmente inklui ho eskrita, maibé laiha resposta husi governu hodi halo atendimentu ba komunidade nia preokupasaun iha areas rurais.
Reportazen : Chamot Nahac
Editor : Agapito de Deus
