Lafaek News–Populasaun suku Liurai postu administrativu Reméxiu, munisipiu Aileu halerik ba estrada husi Reméxiu-vila ba suku Liurai too oras kontinua grave hodi hasusar povu kiik sira lori produtu lokal ba merkadu.
Reprezentante populasaun suku Liur, Jacinto da Costa ba lafaek news hatete, estrada husi postu ba suku Liurai udan ho bailaran kontinua at ba bebeik dezde kedan okupasaun Indonézia too ohin lorin Timor independénsia tinan 20 ona governu la tau matan.
Haree ba kondisaun estrada ne’ebe mak liga hosi postu ba iha suku Liurai ne’e la’os foin mak at ne’e la’e, kondisaun estrada grave kedas hosi tempu Indonézia too ohin loron ita selebra loron restaurasaun Independénsia ba dala-20 iha Timor Leste, dehan Jacinto ba lafaek news iha suku Liurai sábadu foin lalais.
Jacinto preokupa tebes ho kondisaun estrada liga husi postu administrativu Reméxiu ba suku Liurai dezde okupasaun Indonésia mai to ohin loron, populasaun sira tenke lori produtu lokal la’o ho distánsia kilu-,etru 12 hafoin too iha merkadu postu administrativu Reméxiu.
Ami komunidade asesu estrada liga mai postu mak la diak dezde uluk mai to agora, komunidade sira asesu merkadu tenke la’o ain atu lori sira nia produtu mai iha postu Remexio rasik ho distánsia ida ne’ebe dook,’’katak Jacinto.
Jacinto husu governu atu tau matan estrada husi Dili ba Reméxiu no husi Reméxiu liga suku LIurai, hadia estrada di’ak atu fasilita populsaun sira husi suku remotas ne’e bele lori ba produtu ba merkadu atu bele hetan netik osan rahun uituan, tanba suku Liurai porsentu 99 moris ho agrikultor.
Haree ba problema hirak ne’ebe populasaun suku Liurai hasoru nia mos ha’u triste, se bainhira nai ulun balun mak atu halo vizita ba suku ne’e ho transporte tenki liu hosi Dili foin ba nia suku, autoridade sira la tur nonok de’it sempre buka alternativu seluk ho komunidade sira ho insiativa rasik hakarak atu hadia maibé distansia mak dook liu,” Nia hakotu.
iha sorin seluk, Administradór postu administrativu Reméxio munisípiu Aileu, Gastão Mendonça hateten, estrada internal postu Reméxio tinan-bailoron nafatin hela de’it, pedidu hatoo ona atu buka alternativa loke estrada husi Beluru liga Kero ba Aikoerema, maibé governu sentral seidauk konsidera proposta husi postu Reméxio.
Administradór Reméxio afirma, iha tempu ne’eba governu liu husi Obras Publika mai haree ona kondisaun estrada Reméxio, laran metin loos atu normaliza estrada ne’e, maibé sira mai halo emerjénsia de’it, tanba tempu ne’e ai boot ida mos monu satan hela iha dalan MOP mai tesi mak ai tohar ne’e, hadia liu de’it too agora kondisaun estrada mak laiha mudansa no at ba nafatin.
Too agora kondisaun estrada mak laiha mudansa no at ba nafatin,’’ dehan administradór postu Reméxiu,
Gastão dehan, Nu’udar administradór postu nunka tuur nonok iha fatin, sempre hatoo proposta ba governu liu husi administrador munisípiu, konsege fanu MOP mai survey iha semana kotuk liubá, no mos iha tinan kotuk akontesimentu dezatre naturais iha loron 4 Abril 2021, relatóriu hotu hatama ona ba governu, maibé too ohin loron rezultadu laiha.
Estajiadu : Nicolao Fernandes
Editor : Agapito de Deus
