Lafaek News – Komandante Tránzitu Munisípiu Díli, Inspetór Xefe Domingos Sarmento Gama informa, funisionáriu husi Gabinete Palásiu Governu matan delek tanba kontinua viola lei tránzitu liu-liu sinaís Tránzitu hodi para kareta arbiru iha resintu palásiu governu.
Inspetor Xefe polísia, Domingos afirma maske PNTL kontinua apela liu husi kanal media sira, maibé funsionáriu hirak ne’e kontinua kontra regras tránzitu iha area palásiu governu nian.
Sinaís Tránzitu iha hela sira (funisionáriu) haree hela maibé la kumpri signifika sira ne’e matan aat no ema ne’e la normál no ema ne’e la hatene lee no hakerek pior liu tan mak iha palásiu governu,” dehan Inspetór Xefe Domingos Sarmentu Gama ba jornalista iha resintu palásiu governu Dili, segunda 09/05/2022.
Inspetor Xefe PNTL ne’e esplika, bainhira ema ne’ebé halo estasionsmentu arbiru konsidera funisionáriu sira ne’ebé mak para kareta arbiru ne’e Difisiénsia matan.
Agora dadaun ita iha resintu palásiu Governu haree iha fatin ita hamriik ba ne’e iha sinaís tránzitu destaka iha ne’e katak, proíbidu halo estasionsmentu, bandu atu halo parajen iha ne’e, más loron -loron ita nia sidadaun sira ne’e laiha ida mak iha konsiénsia rasik katak fatin ida ne’e halo paragem” Domingo lamenta.
Hodi dehan, iha lei Kódigu estrada artigu 120 ko’alia kona-ba rekézitu atu hetan kartaun kondisaun katak,sidadaun ida tenke matan di’ak, ka la’ós Difisiénsia matan, sidadaun ne’ebé normál, nune’e mós ema analfabetu mós labele hetan karta kondusaun.
Matan aat labele hetan karta kondusaun, segundu psikoijikamente ema normál ema la’ós bulak labele hetan karta kondusaun, e tuir ema la hatene lee no hakerek mós labele hetan karta kondusaun, se ema oin moos ne’e labele para estasionsmentu arbiru,’’ tenik nia.
Domingos deklara, funsionáriu sira ne’ebé para arbiru ne’e konsidera analfabetu tanba la hatene lee no hakerek maka ikus mai para arbiru iha fatin bandu sira ne’e, nivel ema sira ne’ebé labele hetan karta kondusaun tanba sira para arbiru. Nia haktuir
Kuandu iha fatin estasionsmentu mak bandu labele halo paragem, mak sira kontra nafatin ne’e, konsidera sira ne’e matan aat, se matan di’ak hela katak sinais bandu labele para, loos ka lae?, ema sira iha area rural ne’e kumpri regras maibé funsionariu sira ne’e kontinua kontra regras hirak ne’ebé mak PNTL hamutuk diresaun Nasionál transporte terrestre (DNTT) fo sai ona, Polísia Tránzitu lamentavel tebes ema sidadaun di’ak tenke kumpri no tuir lei sira neb mak ita nia nasaun estabelese, tanba ninia lei sira, sira la konsidera la respeita ona, fará mais ba rai seluk atu respeita ema seluk nia lei, ida ne’e labele akontese iha nasaun ida ne’e” deklara nia.
Nia lamenta, Maske nasaun Timor Leste opta nasaun Repúblika Demokrátika Timor-Leste labele tolera ho hahalok bandidu sira hanesan ne’e tanba la’os sidadaun normal.
Observasaun jornalista Lafaek News iha terenu nota katak, PNTL liu husi polísia unidade tránzitu prende kareta ne’ebé para arbiru iha area palásiu governu hodi bele kumpri regras sira mak aplika ba sidadaun sira ne’ebé mak kontra viola lei Tránzitu nian.
Jornalista : Orlando Magno
Editor : Agapito de Deus
