Lafaek News–Governu liuhusi reuniaun Konsellu Ministru (KM) aprova projetu dekretu lei kona-ba pagamentu subsídiu fin do ano (gajih tiga belas) ho valor dolar $200 ba uma kain ida-idak iha Timor-Leste.
Ministru Prezidénsia no Konsellu Ministru (MPKM), Fidelis Manuel Leite Magalhães hateten, apoiu ida ne’e ho montante $200 dolar amerikanu ba kada uma kain.
Apoiu proposta dekretu lei ne’e sei hatuur ho tipu de apoiu, modalidade de apoiu maka universal, katak ba uma kain hotu-hotu, entaun ita la target de’it ba grupu balun ida ne’ebe mak ita halo antes ne’e halo ho target ba ema ne’ebe nivel vensimentu $500 mai kraik, agora laiha, agora ba hotu-hotu, “dehanFidelis Magalhães hafoin remata enkontru KM iha Palasio Governu Dili, sesta (06/05/22).
Governante ne’e akresenta, subsídiu fin do ano ne’e ba uma kain hotu-hotu maibe ba familia hirak ne’ebe mak rejistu tiha ona iha livru rejistu uma kain nian ho data ikus liu mak iha fulan fevereiru liuba.
Enkuantu orsamentu preve ba programa subsídiu fin do ano ne’e hamutuk $60 milloens resin.
Programa de orsamentu, ita iha finansas halo konfirmasaun iha $60 milloens i tal, depois debate espesifiku ne’e ita boot sira bele akompanha,” hakotu Nia.
Jornalista : Juvita dos Santos
Editor : Agapito de Deus
