Lafaek News--Polísia Nasional Timor-Leste (PNTL ), eskuadra Kristu-Rei munisípiu Dili kaptura estudante nain tolu deskonfia envolve kazu tuda malu entre estudante ESG 5 de Maio ho ESG 12 Novembru, Rezulta Komunidade Klakfuik nia uma balun hetan estragus.
Komandante Eskuadra Kristu Rei Inspetor Polisia Alexandrino da Costa “Alex Samurai” informa.
Konfrontasaun ne’e mosu iha loron sábadu 30/04/2022, oras tuku 09 ho balun iha aldeia Klakfuik suku Bekora Postu administrativu Kristu-Rei munisípiu Dili, akontesimentu tuda malu ne’e membru polísia too kedas hodi hakalma situasaun.
Ohin ita ba iha fatin akontesimentu kaptura estudante nain tolu rua husi 12 ESG Novembru no ida husi ESG 5 de Maiu agora ita halo ona prosesu identifikasaun no estudante aira ne’e sei kumpri oras 12 hafoin fila ba uma,” dehan Komandante Eskuadra Kristu Rei Alex Samurai ba Lafaek News Iha fatin akontesimentu Klakfuik Bekora, sábadu (30/04/2022).
Inspetór Polísia Alex Samurai informa, Komunidade no estudante sira labele husik ema ne’ebé hakarak halo problema iha bairo ka eskola tenke kaer ema ne’e lori ba polísia hodi submete investigasaun.
Husu ba estudante no Professor inklui komunidade sira bainhira estudante ida ka rua halo problema iha eskola ka bairo laran kaer nia futu metin lori ba polisia depois mak prosesa nia tuir lei,” Alex Samurai Sujere.
Iha sorin seluk, Komunidade Klakfuik Alicia Preficação informa, dezeitendimentu entre eskola rua ne’e laos foin akontese, maibé bei-beik ona mosu hanesan ne’e bainhira sira ezame ikus nian, maibé komunidade mak sai vítima tanba uma hetan estragus.
Eskola rua ne’e tuda malu beibeik ona hanesan ne’e, sira halo problema depois dame hotu halo fali problema, hanesan ohin komunidade nia uma barak mak hetan estragus,” Alisia deklara.
Alicia esplika, hafoin akontesimentu nee akontese polisia to’o kedas iha fatin akontesimemtu hodi hakalma situasaun maibé estudante sira nafatin haklalak.
Ohin sira tuda malu la kleur polisia mai kedas maibé estudante sira nafatin la fiar polísia sira hasee, tanba ne’e polísia mos husik hela hodi telefone fali ba unidade Batallaun Orden Publika (BOP),” Alicia haktuir.
enkuantu, Lafaek News tenta konfirma Diretór husi eskola rua ne’e, maibé lakohi fo komentáriu tanba seidauk hatene lolos natureza husi problema ne’e.
Obrservasaun Jornalista iha terenu nota katak, hafoin akontesimentu tuda malu nee akontese polisia Komandante eskuadra Kristu-Rei ho nia membru, too kedas fatin akontesimentu hodi hakalma situasaun aleide nee liu minutu balu Unidade Batalion Orden Públiku (BOP), mos to’o kedas iha fatin akontesimentu.
Jornalista : Orlando Magno
Editor : Agapito de Deus
