Lafaek News–José Martins nu’udar aman husi labarik nain lima ne’ebe hetan asalta husi ema deskonesidu nain ha’at ho armas, esplika ba Lafaek News katak, nia la rai kilat iha nia uma, asaun brutalizmu husi grupu deskonesidu ne’e hanesan du’un matak.
Ha’u laiha kilat, nusa mak mai dehan ha’u rai fali kilat, no ha’u nia armariu sira estraga hotu odamatan tebe a’at, ha’u latene tanba ha’u laiha kilat duni, derepente dehan ha’u subar kilat iha uma, agora ema nia hanoin ba ha’u saida, odio ha’u ka kona-ba partidu ka saida ha’u la hatene, ida ne’e mak halo ha’u hanoin lakon tiha kedas” Esplika José Martins, hanesan uman nain no aman ba labarik nain lima konta ba lafaek news hafoin tuir investigasaun iha komandu PNTL Munisípiu Likisá, Sábadu (30/04/2022).
Eis xefe suku Ulmera ne’e afirma, nia parte lamentavel tebes ho aktu grupu deskonesidu ho kilat tama nia uma iha oras kalan hodi harahun nia armariu, odamatan no janela no hatauk labarik sira ho maneira se kilat ba ulun halo labarik sira traumátiku.https://lafaeknews.tl/ema-sivil-uza-armas-asalta-komunidade-ida-nia-uma-iha-tuku-10-kalan/
Iha sorin seluk, reprezentante vítima Renato de Jesus, konta kronolojia katak ema sira ne’ebé mai ho kilat iha tuku 10 kalan, nia ho ninia alin nain haat toba dukur ona, derepente ema dere oda matan, maibé nia ho nia alin sira la loke odamatan, nune’e grupu deskonesidu sira tebe odamatan ho forsa hodi harahun tama ba laran se kilat ba labarik sira hodi haruka buka kilat.
Ami deskansa hela, derepente ema mai bolu ami, ami la loke odamatan tanba ami tauk no ami hanoin ema atu nauk, ami hakilar dehan nauk-ten, entaun sira tebe odamatan nakles sira tama mai haruka ami toba hotu iha rai, sira komesa bolu ona ha’u nia alin, sira deskonfia katak uma ne’ebe mak ami hela subar kilat, sira lori ida ne’e dun ami tun sae no pankada tan ha’u nia alin sira, sira hatais sivil más sira kaer kilat, depois investiga tun sa’e ami, no buka tun sae iha uma laran lahetan buat ruma, sira husik ami sai ona husi uma mak viziñu sira mai, Xefe aldeia telefone ba Polísia mai, Renato konta ba Lafaek news iha resintu edifísiu PNTL Munisipiu Likisá.
Enkuantu iha konferénsia imprensa, porta voz, Ernesto de Jesus, esplika, horiseik sesta 29/04/2022, uma nain ho família sira ba partisipa iha seremónia prenda iha postu administrativu Railaku, munisípiu Ermera, no husik hela alin nain 5 mak hein hela uma.
Nune’e, iha tuku 10:30 oras kalan iha Bairu Nasuta Aldeia Terelau suku Ulmera iha grupu deskonesidu mai armadu la utiliza uniforme seguransa nian (sivil) mai ho kilat kompletu la hatudu sira nia identidade hanesan autoridade seguransa, sem mandadu buska aprensaun no sem mandadu de detensaun husi Tribunal nian mai bolu dehan apa ama loke odamtan, tanba tauk alin sira la loke odamatan maka sira hodi tebe rahun odamatan no tama ba uma laran hafoin halo torturasaun ba iha alin nain 5, baku no sei kilta ba sira nia rentos dehan book an mate,, alin sira trauma no tanis no grupu refere obriga alin sira hatudu kilat matebian Komandante Mauleto nian.
Ema deskonesidu kontinua halo torturasaun ba sira no latan sira ba rai hodi see kilat ba sira , halo sira trauma no balun to dezmaia, Iha kalan ne’e kedan iha mos prezensa xefe aldeia Domingos de Jesus hanesan mos viziñu rona no haree grupu ne’e karega kilat tarutu hodi see ba xefe aldeia dehan ne’e ordem komandu ko’alia agora mate kedas.
Ernesto afirma, gupu refere obriga nia alin Nivio sei kilat ba nia kanuruk hodi la’o ba to’os laran no dehan kilat ne’e subar iha toos laran, hafoin lori fila mai hodi tebe dala ida, kontinua tama ba uma laran hodi baku alin Elviano no see kilat ba nia hodi dehan kilat nee’ o nia aman subar iha ne’ebe? Labarik foin maka book an sira dehan hamrik nonok book an mate, hotu tiha sira kontinua estraga sasan uma-laran hanesan armario ho janela inklui harahun odamatan.
Objetivu prinsipal husi grupu armadu ne’e nian mai atu buka kilat husi Saudozu Komandante Mauleto nian, tuir ami povu nia entendimentu instituisaun ne’ebé maka utiliza kilat maka F-FDTL, PNTL no PCIC,’’katak Ernesto de Jesus ba jornalista sira iha konferénsia imprensa iha fatin akontesimentu Nasuta aldeia Terelau, sábadu (30/04/22).
Família vítima ne’e hateten, ho razaun hirak ne’ebé mak iha leten husu ba autoridade seguransa liu-liu ba komandu F-FDTL, Komandu PNTL no PCIC atu kontrola mebru sira iha ambitu utilizaun ba arma, husu mos ba atoridadade seguransa kontrola armas ilegais ne’ebé da-daun ne’e espalha iha teritóriu laran.
Tanba ami haree rasik ho ami nia matan ema sivil maka utiliza armas hodi mai sérku ami nia uma, husu mos ba autoridade kompetente liu-liu autoridade judisiária atu halo investigasaun klean ba kazu ida hodi buka tuir no kaptura hotu autor sira atu nune ami povu bele moris ho livre la iha torturasaun iha ami nian rain rasik, kilat ne’e lori ruin ho ran herois rihun ba rihun nia ruin no ran mak sosa tamba nee la merese kilat ne’e nia tutun atu se fali mai ami tanba kilat ne’e ami povu nian,’’ família vítima ne’e rekomenda.
Tuir Família esplika Matebian Mauleto hanesan eis Militar ( Petisionáriu ) ne’ebe ema deskuinesidu temi naran hodi dehan nia kilat rai hela iha vítima José Martins nia uma, maibé família deklara realidade kilat ne’ebe Matebian Mauleto iha Intrega ona iha tinan 2007, José Martins iha duni relasaun Familia hanesan tiun ho subrino, no matebian saudozu Mauleto nia uma ho distánsia metru 500 husi nia tiun José Martins iha aldea Terelau Nasuta Suku Ulmera, postu Bazartete munisípiu Likisá.
Entretantu, liga akontesimentu ne’e lafaek news konfirma kedan ho komandante PNTL munisípiu Likisá iha loron sábadu (30/04/2022), maibé seidauk fo deklarasaun ofisial ba jornalista Lafaek News ho GMN TV ho razaun parte polísia sei iha prosesu investigasaun.
Jornalista : Acacio Pinto
Editor : Agapito de Deus
