Lafaek News–Reprezentante negosiante munisipiu Vikeke, Selina Guterres, husu kandidatu prezidente repúblika nain rua Ramos Horta ho Lú Olo bainhira povu fo fiar ba ida tenke ko’alia ho governu hodi hadia estrada munisípiu Vikeke dezde governasaun primeiro too agora la halo reabilitasaun no kria merkadu ho kondisaun saudavel ba negosiante sira hodi fan produtu loka.
Dalan husi Vikeke ba Dili maka at loos, tan ne’e husu Prezidente foun karik bele husu ba Governu atu kontinua hadia ami nia estrada para fasilita ami fan ami nia produtu no bele lori ba fan iha Baukau ho Dili,’’ katak negosiante Selina Guterres ba lafaek news iha merkadu Vikeke, sesta (08/04/22).
Selina haktuir, durante ukun iha periodu governasaun ida ba governasaun seluk ladun tau prioridade ba estrada Vikeke nune’e too ohin dalan at kedan komesa husi Baukau too Vikeke, impaktu ba povu kiik sira ne’ebé halo atividade negosiu iha merkadu susar atu ba sosa nesesidade iha Dili lori ba Vikeke.
Ha’u sosa modo husi Dili Fan fali iha Vikeke, maibé estrada ne’e ha’u haree laran susar tebes atu buka moris, ha’u husi ne’e ba sosa sasan iha Dili Mai Baukau depois mak mai fan iha Vikeke-Vila,’’ kata Selina.
Produtu lokal hirak ne’ebé negosiante fan iha merkadu Vikeke Vila mak hanesan liis -mean, fehuk ropa, senora, koto no seluk, maibé produtu hirak ne’e sosa tutan fali husi merkadu Taibesi ne’ebé lori tutan mai husi Aileu ho Maubisse.
Negosiante ne’e mos trieste kona-ba fatin merkadu ne’ebé nia ho ninia maluk negosiante sira okupa hodi fan produtu lokal hirak ne’e ladun seguru iha tempu udan, saida mak akontese, sira halo baraka kiik taka ho lona roha iha krabat leten, kesi ho tilu rafia hodi taka netik loron manas no udan boot hodi kontinua fan sira nia produtu.
Maske, rendimentu ladun, maibé loron ida husi dadeer too loro-kraik bele hetan netik dolar 50, sorte laiha hetan de’it dolar 25, dala ruma hetan tuun liu dolar 10, depende ba ema sosa, tanba la’os ema ida de’it mak fan, maibé negosiante barak maka fan produtu ne’ebé kuaze hanesan.
Razaun fundamental Selima sosaa fali modo husi Dili mak lori ba fan iha Vikeke, tanba agrikultor sira iha munisipiu refere ladun halo toos kantreiru hodi kuda modo, tanba ne’e negosiante sira prefere sosa produtu husi prasa Dili ho Baukau lori ba fali konsumidor sira iha munisipiu Vikeke hodi sosa responde nesesidade loro-loron.
Jornalista : Acacio Pinto
Ediror : Agapito de Deus
