Lafaek News-Ekipa susesu kandidatu prezidente repúblika (KanPres), Francisco Guterres Lú Olo, husu Comisaun Nasional Elesoens (CNE) atu toma medida rigorozu hodi hatudu duni imparsiálidade tuir dever nu’ udar órgaun supervizaun iha eleisaun prezidensiál 2022.
Representante legal ekipa susesu partidu FRETILIN, Fernando Dias Gusmão deklara asuntu ne’e relasiona ho kandidatu prezidente repúblika númeru 1, José Ramos Horta ho partidu CNRT iha loron (7/04/22) realiza mini-kampaña iha postu administrativu Atsabe, munisípiu Ermera, iha oras kalan liu ona tuku neen, viola regras estadu nian ne’ebé hatuur ona kalenadiu CNE ba kampaña eleitoral.
Ekipa susesu kandidatu Francisco Guterres Lú Olo, husu ba CNE atu toma medida rigorozu, hodi hatudu duni imparsiálidade tuir dever ne’ebé iha, nu’ udar órgaun supervizaun imparsiál ba eleisaun prezidensial ida ne’e tuir regras estadu haruka”, dehan representante legal Fernando Dias Gusmão hafoin halo komnikadu imprensa iha sede hotel Suz Clarita Formoza, sesta (08/04/2022).
Fernando akresenta, nia parte husu mós ba média no públiku tomak atu matan moris nafatin nune’e la husik ema hakaat regras estadu, ne’ebé garante sosiedade moris ho disiplina koletiva atu ema hotu kontribui ho responsabilidade hodi hametin estadu direitu demokrátiku.
Kona-ba limitasaun tempu kampaña eleitorál, artigu 11.º husi dekretu ne’e regula katak propaganda eleitóral bele de’it akontese husi tuku Ualu dader too neen ho balun kalan,’’esplika Fernando Gusmão.
Jornalista: Rita Moniz
Editor : Agapito de Deus
