Lafaek News–Estudantes Universidade Nasionál Timor Loro sa’e (UNTL), Fakuldade Edukasaun, Arte no Umanidade husi tinan 2021 to’o 2022, hamutuk 2089 husu universidade atu devolve (fo fila) osan $.8356..0 ba estudantes hamutuk 2089 ho razaun manual orientasaun akademiku ba estudantes foun la distribui dezde 2021 too ohin 2022.
Universidade Nasional Timor Lorosa’e nu’udar úniku Universidade Públiku iha Timor-Leste, iha fakuldade 9, departamentu haat nulu (40), no Fakuldade Edukasaun, Arte no Umanidade mak hanesan Fakuldade ida ne ‘ebe bo’ot liu iha universidade nasional ne’e kompostu husi Departamentu 10, kada tinan UNTL nomeadamente FEAH simu estudante foun ho kuantidade bo’ot liu husi rihun ida, maske fasilidade sala de aula menus.
Mata-dalan ka manual orientasaun akademika ba estudante foun la fahe desde 2021 to’o agora,Ttir dadus estudante foun fakuldade edukasaun, arte no umanidade husi tinan 2021 to’o 2022 hamutuk 2089 ho montante osan $8356.00 dolares amerikanu ba manual orientasaun,” dehan porta voz Zesinho da Silva Barreto iha Liceu UNTL, Kinta (07/04/2022).
Hodi argumenta, normalmente mata-dalan orientasaun akadémika ne’e distribui ba estudante sira iha momentu orientasaun akadémika realiza, la’ós aula normal maka distribui, maibé iha situasaun ida ne’e estudante sira la hetan mata-dalan orientasaun akadémika atu sira kaer rasik.
Asosiasaun Akadémika Estudantil FEAH nu’udar organizasaun ida hamahan estudantes sira hodi konsolida hanoin hato’o aspirasaun no direitu balun ne’ebé la hetan da-daun iha orientasaun akadémika, hanesan matadalan ka manual ba orientasaun akademika nian.
Ami la ezije manual ne’e tenki imprime ba estudante sira maibé ami ezije liu mak estudante sira nia osan ne’ebé entrega ona ba UNTL nu fim la fó resposta ba osan ne’e, estudante sira ne’e tama mai kompleta ona osan rejistrasaun hamutuk $.87 dolares amerikanu. Osan sira ne’e inskreve tuir kedas item ida-idak no osan ba manual orientasaun ho montante osan $4.00 dolar kada estudante,” tenik nia
Asosiasaun Akadémika Estudantil FEAH lamenta tebes ho kualidade servisu estrutura UNTL ne’ebé laiha seriedade ba atendimentu estudante sira, liu-liu sira nia direitu.
Ami husu ba Magnifiku Reitor UNTL atu labele sai subordinadu ba estrutura sira iha ita bo’ot nia okos, atu nune’e labele prejudika servisu administrasaun UNTL nian,’’ katak portavoz estudantes ne’e.
Husu mos ba Vise-Reitor, Pro-Reitor no Diretor Jerál sira atu labe labele foti-an hanesan ita bo’ot sira mak matenek liu no labele fo sala beibeik ba lei aprovizionamentu ninian implementasun, UNTL atu atinji nia visaun sai Sentru Eselensia la’os deit estrutura atuál nia servisu iha mandatu agora maibé entidade hotu-hotu nia apoiu hahu husi Estudante, Dosente no Funsionariu sira hotu, tamba ne’e ami husu ba estrutura atual atu labele hatudu imi nia servisu ne’ebe la justu no la profesionál mai ami estudante sira. Ami hakarak imi nia matenek hatudu mós ho hahalok.
Ami nu’udar orgaun masimu estudante sira nian iha nivél Fakuldade husu ba Magnífiku Reitór UNTL Profesor Dr. João Soares Martins atu hatun despaixu ida hodi devolve fila fali estudante sira nia osan ne’ebe entrega ona. Ami promete, orientasaun akadémika ida ne’e remata ami sei organiza fila fali estudante sira husi turnu 2021 ho 2022 nian atu ba ejije sira nia direitu ne’ebé UNTL la responde,’’ nia hakotu.
Entretantu liga ho asuntu ne’e lafaek news tenta konfirma ho reitor Universidade Nasional Timor Loro sa’e (UNTL), maibé la konsege halo konfirmasaun tanba lider másimu universidade nasional ne’e ho nia estrutura laiha fatin, tanba sei partidipa hela serimonia ida iha Hera.
Jornalista : Felisberto Fernandes
Editor : Agapito de Deus
