Lafaek new–Diresaun Nasionál Promosaun Dezenvolvimentu Média Lokál (DNPDML) konvida radiu komunidade sanolu resin hitu inklui radiu defisiente no radiu ne’ebé eziste iha kapitál kuaze sanolu resin, hodi tuir formasaun konba utilizasaun software no live reporting hodi bele adapta an ba avansadu teknolojia ne’ebé mundu agora iha.
Formasaun ne’e ho tema utilizasaun software no live Report ba rádiu komunidade sira oinsá adapta an ba mudansa teknolojia mundu ohin loron ne’e hasoru, mundu agora ko’alia ona kona-ba Youtube no broadcast, karik iha ona software seluk ne’ebé iha nasaun seluk ejiste, liu hosi formasaun ne’e sei fahe klean liután ba malu hodi dezenvolve media lokál adapta tuir teknolijia ne’ebé iha.
DNPDML organiza formasun ba loron rua ho objetivu prinsipál atu hasa’e koñesementu jornalista radiu komunidade sira nian ba dilvugasaun informasaun atravez kanais sira ne’ebé existe iha mundu ohin loron. Hasae koñesementu jornalista sira nian hodi halo reportazen direta iha eleisaun no planu redasaun nian ne’ebé jornalista sira haknaar an ba.
Output hosi formasaun ne’e mak, jornalista radiu komunidade sira sei bele opera software ka ekipamentu dijitalizadu ne’ebé kada instituisaun media radiu komunidade iha. Jornalista sira bele divulga informasaun sira ne’e kredivél ba sosiedade sira” dehan José da Costa Diretór Nasionál Promosaun Dezenvolvimentu média Lokál, iha ótel JL Villa, Aimutin, Dili, ohin kuarta, (06/04/2022).
Iha sorin seluk Prezidente Interinu Konselu Imprensa Expidito Loro Dias Ximenes hatete, iha era modernu ne’e la’ós ona jornalista ka media konvensionál sira mak sai produtór ba informasaun maibé sidadaun ida-idak ne’ebé asesu internet iha nia uma, iha sosiedade, iha dalan ka iha ne’ebé de’it, nia mós sei sai produtór ba informasaun.
Sidadaun hotu-hotu tenke halo distinsaun saida mak informasaun no saida mak notisia. Informasaun, ema hotu bele halo, bainhira nia iha android nia bele halo informasaun, maibé notisia bazea ba faktus mak notisia ne’ebé so ema jornalista de’it mak bele halo.
Jornalista bainhira ba halo kobertura hotu, nia mai sei liuhosi prosesu, sei liu hosi editór, sei liuhosi xefe redasaun mak foin bele fós sai ida ne’e mak bele dehan produtu jornalistiku. Ida ne’e bazea ba fanktus no faktus sira ne’e mós bazea ba kode etiku jornalismu nian,” tenik nia
Radiu komunidade iha pontu forte kompara ho televezaun, tanba radiu lalais liu, radiu, bele iha merkadu, iha toos laran ema bele asesu tanba nia atualidade di’ak liu maibé kompara televezaun, bainhira mak mak ba foti, mai estudiu hodi edit, no prosesu ne’e naruk hodi fó sai notisia.
Radiu komunidade nia papél importante hodi halo direitu siviku politiku iha situasaun eleisaun prezidensial tanba bele hato’o saida mak komunnidae sira hakarak no ida ne’e sai pontu forte ne’ebé radiu iha.
Jornalista : Felisberto Fernandes
Editor : Agapito de Deus
