Lafaek News–Juventude bairo Seroja aldeia Golgota, Delinson Moniz Do Carmo konsidera Governu hamosu estadu kapitalista halakon estadu demokratiku bainhira governu fo rai estadu ba instituisaun privadu hanesan Eskola São Miguel Arcanjo.
Estadu la fo previléizu ba nia povu, maibé fo previléiju ba instituisaun privadu São Miguel Arcanjo hodi aranja fatin ba instituisaun refere signifika ita kria estadu kapitalista la eziste ona estadu demokratika ema neebe iha osan bele ukun no bele halo buat hotu,” dehan Denilson iha Bairo Seroja Dili, sesta 25/03/2022.
Denilson esplika, tinan 20 mai tan ema nee iha osan bele aluga palasio governu ho palasiu prezidente tanba ema iha osan bele halo buat hotu entaun Timor kuda ona jerasaun neebe aat iha rai laran.https://lafaeknews.tl/komunidade-diskorda-desizaun-governu-duni-sai-populasaun-harii-instituisaun-privadu/
iha sorin seluk, komunidade Bairo Seroja, Hermengildo da Silva afirma, sira fo hatene ona ba parte relevante lakoi simu sentavus ida husi estadu maibe sira sei la aseita bainhira hasai komunidade husi bairo seroja harii fali edifisiu privadu.
komunidade sira neebe hela iha bairo seroja nee kuaze tinan 20 resin no fatin nee uluk radio Tomor lorosae mak iha nee,” Hermengildo Relata.
Iha fatin hanesan komunidade seroja, Julio de Jesus esplika, rai nee la iha ida mak nain maibe ema hotu hatene rai nee estadu nian, nia la simu tanba deit atu harii instituisaun privadu neebe halo konkalikon ho governu maibe atu harii instituisaun governu sira prontu kopera.
instituisaun privadu nee iha nian rai tanba kada fulan nia hetan lukru husi estudante sira maibe tanba saida mak São Miguel hanesan intituisaun privadu ida governu konsidera nia hanesan osan mean depois povu nee atu tau iha neebe,” Julio reklama.
Julio reafirma, povu seroja hamutuk iha nee laos atu kontra governu maibe sira la konkorda ho governu nia desizaun prepara fatin ba instituisaun privadu duni sai fali povu serake instituisaun nee iha rasik osan nusa la buka fatin seluk.
Duni ami sai husi nee, depois ami atu ba iha neebe? ami la konkorda estadu hasai ami atu harii fali instituisaun privadu iha ami nia fatin sera ke ami povu hanesan deit tanba eskola São Miguel laos instituisaun governu,” Julio lamenta.
Xefe Aldea Golgota, Bairu Seroja, Agostinho de Sousa Pereira hatutan, hanesan autoridade lokal nia labele diskrimina populasaun ho governu maibé rua ne’e tenke koopera hotu.
Hanesan Xefe aldea ha’u husu nafatin ba parte Ministériu kompetente atu buka took solusaun ruma hodi bele fó solusaun ba populasaun aldea ida ne’e, liliu bairu seroja ne’e nia problema, liliu ba populasaun sira ne’ebé avetadu ba konstrusaun edifisiu São Minguel”, dehan Nia
.Enkuantu totál populasaun uma kain iha aldeia golgota bairu Seroja hamutuk 72, maibé uma kain ne’ebé afeta ba rai estadu seidauk iha dadus tanba governu seidauk termina ninia baliza.
Hatan ba komunidade Seroja nia preokupasaun, Diretór Jerál Terras Propriedade, Rodrigo Mendonça esplika, loos duni eskola São Miguel Arcanjo nee institusaun privadu, governu la preokupa ho eskola privadu ka publiku maibe preokupa deit ba estudante rihun resin nee ninia futuru ba oin.
Bainhira preokupa interese estadu, tenke preokupa mos ba estudante sira nia futuru tanba laos eskola publiku deit mak prepara ema ba futuru.
Governu prepara fatin ba eskola São Miguel Arcanjo ho razaun katak, eskola nee harii iha inisiu hetan koñesimentu husi governu, no mos akumula estudante sira husi suku madohi, komoro no mos Tibar entaun governu labele muda eskola nee dook husi estudante sira hodi prezudika sira nia atividade,” Diretor Jeral Terras Propriedades Rodrigo relata.
Rodrigo realsa, iha konstituisaun RDTL, artigu 54° alinea 2 nee koalia klaramente katak, rai privadi mos governu kuandu presiza, rai nain tenke husik fatin nee entrega ba governu ba interese estadu nia atu halo dezemvolvimentu.
Nia afirma, ema ida dehan estadu kapitalista nee ninia interpretasaun pesoal, nia hela iha ne’eba selu taxa estadu ka lae? halo konstrusaun iha linsensa ka lae? karik nia iha lisensa governu konsidera maibe obrigatoriu tenke hasai tanba interese estadu nia boot liu.
Se ita abandona estudante sira entaun futuru nasaun nee ba iha ne’ebé? afetasaun ba estudante no projetu boot liu, komunidade nia ezijensia, sira dehan kapitalista maibe sira rasik mak sai kapitalista tanba sira lakoi tau interese estadu boot liu interese pesoal,” nia dehan.
Rodrigo rekomenda, husu ba komunidade sira atu kopera ho governu nunee governu bele konsidera sira nia situasaun, se kimunidade bairo serija lakoi kopera ho governu entaun hasai obrigatoriu tuir lei neebe iha tanba ema ho ema mak iha sentimentu (Rasa Sosial), ba malu maibe lei la iha sentimentu.
Jornalista :Orlando Magno
Editor : Agapito de Deus
