Lafaek News – Populasaun suku Dukurai, postu administrativu Letefoho, munisípiu Ermera haksolok simu kandidatu independente Prezidente Repúblika periode 2022-2027, Isabel da costa Ferreira hodi entrega karta ida ne’ebé sira rekoñese nu’udar signifikadu boot no hanaran Mãe Isabel.
Portavoz komunidade Dukurai Tomas de Deus Maia hateten, sira hakerek karta no tau iha aú ne’ebé halo ho sira nia liman rasik (tradisionál), iha karta dadolin ne’e sira prefere bolu Mãe Isabel ho nia signifikadu boot tebes.
M : Matenek iha fiar, matenek iha liafuan no matenek iha asaun.
A : Atan ba ema ki’ak, atan ba ema kiik no atan ba ema mukit.
E : Esperansa sempre iha ba nia no nia sai mós esperansa ba ema hirak ne’e lakom dalan.
I : Inan ida ba familia, inan ida ba sosiedade tomak.
S : Sai ezemplu boot iha fiar, sai ezemplu boot iha domin, sai ezemplu boot iha dame no sai ezemplu boot ho simplisidade.
A : Asaun mak boot liu nia resposta iha nia moris la’os liafuan.
B : Belun ba ema hotu la fihir no la hili mezmu kiak, mezmu kiik, mezmu beik, mezmu mukit, mezmu foer.
E : Estabilidade moris di’ak no paz mak mehi boot liu ne’ebé mak atu atinji iha nia mandatu bainhira maromak no povu fó fiar ba nia.
L : Lian ba sira ne’e lian laek mak asaun ne’ebé nia halo nu’udar ativista, nu’udar primeira dama, nu’udar inan, nu’udar katólika.
Ami husu ba dona Isabel ita boot nia ain fatin iha ne’e labele sama de’it iha tasi laloran baku mai lakon, ami husu de’it dona Isabel ita boot nia ain fatin sama iha rai maran, sama iha fatuk leten, udan ka laloran mai mós sei la lakon, la’os sai prezidente mak sama iha ne’e lae, ami husu katak ita boot mai bebeik iha ne’e,” dehan Tomas Maia iha suku Dukurai, postu Letefoho Ermera, tersa (15/03/2022).
Iha fatin hanesan, kandidata Isabel Ferreira hateten, atu sai prezidente ka la sai prezidente nia sei kontinua vizita komunidade sira iha Letefoho.
Atu sai Prezidente ka la prezidente, buat ne’ebé ha’u hanoin atu halo ha’u sei mai hala’o ho ita boot sira, oituan ita halo tuir ita nia kbiit, depois mak aumenta ba sira seluk,” hakotu Isabel Ferreira.
Jornalista : Juvita dos Santos
Editor : Agapito de Deus
