Lafaek News–Kandidatura prezidente repúblika periodu 2022-2027, númeru sorteiu 16, Mariano Assanami Sabino Lopes kompromete sai prezidente kria kampu servisu ba joven sira no hakotu pasadu hodi dignifika joven foin sa’e sira ne’ebé laiha istória.
Kampu servisu ba joven sira, tanba ne’e hau nia razaun primeiru maka ida ne’e, hau hakarak hakotu passadu ho dignifika passadu dignifika lider sira, maibe tenke fo esperansa ba joven sira,’’ katak Assanami iha kampaña eleitoral ba dala-14 iha munisípiu Manatutu, segunda (14/03/2022).
Assanami hateten ema balun mai hodi katuas veteranu sira nia naran hodi halo kampaña maibé Assanami la lori ema ne’ebe koñesidu mai hodi halo kampaña polítika ba povu.
Ha’u mai hamutuk ho ha’u prezidente CPN, ho estrutura partidu demokrátiku ho movimentu sira, maibé ha’u mai ho joven sira no joven juvenil, ne’ebe maka imi la koñese mai iha palku leten atu ko’alia ho joven sira, tanba ha’u nia kandidatu ba joven sira ne’ebe laiha istória,’’ afirma Assanami.
Hodi fundamenta, razaun kandidatu ba prezidente repúblika, tanba nia lakohi prega tan joven sira katak joven bandidu, joven badiu no joven kriminozu.
Ha’u nia razaun kandidatu tanba hau lakoi prega tan fali dehan joven ne’e bandidu, joven ne’e badiu, joven ne’e kriminoju, lae hau hamrik dehan lae, prepara joven nia futuru, dehan joven maka ita nia futuru, joven maka ita nia massa depan, haree joven ita hare Timor Leste ba oin”nia informa
Assanami enkoraja ba kompaneiru, kompatriota, kamarada, ba belun sira hotu, imi bele iha partidu oi-oin, ami la husu para muda maibe imi milineal imi jerasaun foun, vota ba Assanami atu sai prezidente tane jerasaun foun, kria kampu servisu ba jerasaun foun,’’ Assanami hakotu.
Jornalista : Azelio da Cruz
Editor : Agapito de Deus
