Lafaek News (Lautém)–Timor Leste selebra hela eventu palku polítika kompostu husi kandidatus ba Xefe Estadu hamutuk Timor-oan 16, hamriik iha palku leten promete namanas, ida ne’ebé mak ukun liberta povu husi kiak no mukit, promesa hirak ne’e borus ona husi povu nia tilun sorin ba sorin, eis prezidente repúblika nain tolu ho prezidente ida atual ukun ona tinan hamutuk 20, realidade hatudu iha kbiit laek Maria ho nia kaben hateke ba sira nia hela fatin ho rezultadu mata-wen.
Moris iha mundu ne’e, ema hotu iha hakarak atu muda nia moris iha planeta dahaat ida-ne’e, ema ne’ebé iha forsa buka moris konsege hadi’a hela fatin hodi helik netik husi udan been labele turuk kona, no responde nesesidade uma laran, ema ne’ebé laiha kbiit susar tebes atu muda moris, kantiga sira so’e piadas ema riku, riku ba nafatin, ema katak ba nafatin, nai-ulun sira promete hada ho promete.
Realidade hatudu ba Maria da Silva 47 ho nia kaben iha aldeia 30 de Agustu, suku Fuluro, Postu-administrativu Lospalos, Munisípiu Lautem, hela de’it iha uma ne’ebé la merese ona atu hela, tempu udan Maria ho nia oan sira la’o iha bee leten ne’ebé udan sulin husi kalen kuak no didin leet hamosu debu kiik iha uma laran book an teb-tebes mós la di’ak.
Kbi’it laek ne’e konta ba Lafaek News, bainhira udan sira labele hakmatek, iha ne’ebé udan been sulin hadau maluhusi kalen ko’ak ne’ebé fruzen, ai lahuk no didin leet, labele taka netik matan oras ida ka rua, fatin atu toba teb-tebes bokon too ahi matan ne’ebé nu’udar indústria ba kabun nian.
Udan kuandu mai ne’e ami nia uma laran bokon hanesan ne’e de’it, nakonu ho bee nalihun de’it, ami labele tein, ami labele toba,” espresa Maria ba Lafaek News iha nia rezidénsia aldeia 30 de agustu Fuiluro Lospalos foin lalais ne’e.
Maria haktenuk, durante ne’e la’os susar de’it ba kondisaun hela fatin, maibé susar mós ba aihan no osan, aat liu mak sira seidauk hetan uma kbi’it laek ne’ebé governu oferese.
Uma kbi’it laek nian foin da-daun dehan atu rejistu maibé seidauk,” espresa Maria.
Maria husu ba governu atu ajuda hadia nia uma no ajuda mós hahán ruma, tanba nia kaben seidauk hetan servisu ruma hanesan baze fundamental ba moris iha uma kain kbiit laek ne’e.
Ami husu ba governu atu ajuda halo ami nia uma no hahan oituan ba ami,” espresa Maria ho Matan been.
Enkuantu iha oras vizita ne’e husi eis primeira dama, Isabel da Costa Ferreira alista iha nia fundasaun atu fo bolsa estudu ba Maria nia oan primeiru ne’ebé remata ona iha sekundáriu no programa konta bebe ba nain ida.
Iha observasaun lafaek news direta haree ho matan Maria ho nia familia susar tebes atu hakmatek bainhira tempu udan ho anin, uma ne’ebé família kbiit laek ne’e horik hanesan loos bero atraka iha bee leten.
Jornalista : Juvita dos Santos
Editor : Agapito de Deus
