Lafaek News- Prezidente interinu konsellu imprensa Expedito Loro Dias Ximene husu jornalista sir atu lee no komprende Matadalan Reportajen Eleitorál ba Jornalista no Meiu Komunikasaun Sosiál (REJMKS) atu bele halo kobertura ba votasaun iha loron 19 fulan Marsu 2022.
Prezidente hatoo asuntu ne’e hafoin halo lansamentu ofisial ba brosura Matadalan Reportajen Eleitorál ba Jornalista no Meiu Komunikasaun Sosiál sira iha edifísiu Konsellu Imprensa Kintal Boot, segunda (14/03/2022), hateten kualidade jornalismu depende ba kualidade produtu jornalistiku tanba ne’e hein katak ho matadalan ne’ebé foin konsellu imprensa, UNDP no Embaixada Japaun lansa bele ajuda jornalista kumpre ho kódigu étika jornalismu.
Espera katak jornalista sira bele promove liu tan paz jornalismu ka peace journalism katak bainhira iha kampaña kandidatu ka juru kampaña karik ko’alia lia fuan balun ne’e afeta ba kandidatu seluk se bele jornalista sira buka atu felter ka taes informasaun diak ba konsumu públiku mak foin bele fó sai, maibé lia-fuan sira ne’ebé la merese atu fó sai ita bele rai ba ita nia arkivu,’’ afirma prezidente interinu KI ne’e.
Matadalan ne’ebé KI ho UNDO lansa konsidera la trade ba jornalista sira, tanba antes ne’e KI informalmentu oferese tiha ona ba kada instituisaun media, liu-liu media nain, xefe redasaun no diretór informasaun halo reuniaun semana 2, maske laiha formatu brosura, maibé iha suratahan mutin ho nia kontestu ne’ebé hanesan ho brosura ne’ebé lansa ofisial ona.
Alende ne’e, KI halo vizita ona ba rádiu komunidade sira hodi fahe ona mata-dalan hirak ne’e ba sira atu sira mós bele uza halo kobertura iha munisípiu, no matadalan ida ne’e, maske kampaña eleitoral atu remata ona, maibé sei nafatin bele utiliza iha eleisaun parlamentar iha 2023.
Iha fatin hanesan, Diretor Ezekutivu Konsellu Imprensa Rigoberto Monteiro reforsa, KI servisu hamutuk ho UNDP no embaixada Japaun organiza eventu tour jornalismu ho ojetivu atu lori jornalista nain 20 ba teritóriu tolu hanesan, rejiaun leste, rai-klaran no rai-ikun hodi halo kobertura espesífiku ba prosesu eleisaun.
nia dehan, Jornalista hotu hotu sei la partisipa, tanba sira ne’ebé partisipa tenke iha kartaun kredensial vota movél, bainhira KI anúnsia ba aplikasaun kartaun kredensiál ne’e media hamutuk 20, ho rekezitus hirak ne’e KI só bele bolu jornalista reprezentante hosi media sira ne’e hodi tuir tour refere.
Tour ne’e sei hahú viajen iha loron 18, loron 19 halo kobertura ba eleisaun iha fatin hirak ne’ebé mensiona no loron 20 bele fila-fali mai iha Dili, nune’e objetivu fundamental ba tour ne’e jornalista sira bele halo kobertura balansu iha eleisaun., tanba durante ne’e media ne’ebé iha kapasidade bo’ot mak bele kobre votasaun iha kada munisípiu hotu hanesan GMN, RTTL no Taloli, ba media sira ne’ebé rekursu natoon KI hanoin atividade hanesan bele ajuda media hotu hodi bele halo kobertura iha tempu votasaun iha munisipiu hotu.
Jornalista : Felisberto Fernandes
Editor : Agapito de Deus
