Lafaek News-(Ainaru)-Prezidente Fiskalizasaun partidu FRETILIN Prezidente Unidade Arte-Marsial no Arte-Rituais munisípiu Ainaru lori militantes husi partidu FRETILIN inklui membru arte-marsial ho arte rituais entrega ba kandidatu númeru 14 hodi vota iha loron 19 fulan Marsu halo atu simu kna’ar xefe estadu atu hadia imajen Timor iha ba komunidade internasional.
Ha’u mai lori estrutura tolu husi munisípiu postu ho suku hodi apoiu kandidatu Prezidente repúblika 2022-2027 no fo votus ba partidu CNRT iha 2023 lori Xanana Gusmão ba primeiru ministru,’’ Moises Sarmento da Costa afirma afiliasaun ba CNRT iha kampañia dahitu iha kampu futebol munisípiu Ainaru, kuarta (09/03/22).
Moises aleinde nu’udar prezidente fiskalizasaun partidu FRETILIN hanesan mós prezidente arte marsial no arte ritual munisípiu kompostu husi Kera Sakti (IKS), PSHT, KORK, 77,44,12-12 no 99, membru arte rituais no arte marsial hirak ne’e sei apoiu votus ba kandidatu númeru 14 ba José Ramos Horta ba aitarak laran hodi kore povu husi krize polítika ne’ebé afeta ba ekonomia povu iha rai-laran.
Ha’u nu’udar mós prezidente artes rituas no arte marsial hotu iha munisípiu Ainaru, no hau sei lori membru sira husi 77,55,12-12, 99, Kera Sakti, PSHT ho KORK rasik ami prepara hamutuk ho maun boot sira iha tinan kotuk, agora prontu ona apoiu maun José Ramos Horta ba prezidente repúblika no apoiu ba maun Xanana hetan vitoria iha 2023,’ dehan prezidente GAM-GAR munisípiu Ainaru ne’e.
Moises dehan, nu’udar prezidente fiskalizasaun partidu FRETILIN munisípiu Ainaru afirma ona ba militantes partidu FRETILIN hotu iha Ainaru preparadu husi munisípiu Ainaru, suku no aldeia fo votus ba kandidatu númeru 14 José Ramos Horta, FRETILIN Ainaru fahe ona ba rua, barak liu afilia ba CNRT.
Ha’u husu mos katuas veteranus hotu iha Ainaru atu hanoin didi’ak, hau de’it sei apoiu maun Ramos Horta ho Xanana, tanba sa hau nia aman sira imi la apoiu sira nain rua, lidera funu ne’e ba hetan ukun an mak Xanana ho Ramos Horta, merese ita Ainaru apoiu sira nain rua ba ukun hodi hadia rai ne’e di’ak,’’ Moises hatun lia ikus.
Entretantu, iha intervensaun polítika kandidatu númeru sorteiru 14 José Ramos Horta katak, iha loron 19 fulan Marsu loron ne’ebé istóriku tebes, husu povu Ainaru hanesan rai klaran hili númeru 14 atu ba simu kna’ar xefe estadu hodi hadia krize ne’e atu ekonomia Timor bele hakat ba oin.
Tanba ne’e mak maun boot Xanana apoiu hau, bainhira ha’u simu todan hahu kedan diálogu ho partidus polítikus sira komesa kedan husi CNRT no sira seluk atu hakotu tiha violasaun konstituisaun ne’ebé viola maka’as husi prezidente repúblika rasik, ha’u sei ko’alia ho sira hotu oinsá bele halo repoziaun orden konstitusional estadu direitu demokrátiku, hakotu krize atu ekonomia bele hakat ba oin,’’ dehan kandidatu nú-14 iha munisípiu Ainaru kuarta ne’e.
Observasaun lafaek news nota, kampania kandidatu PR númeru 14, hetan partisipaun husi CNE, STAE no observador nasional ho internasional, komisiu polítika ne’e la’o di’ak no hetan seguransa másimu husi PNTL, ktuir ajenda kampania daulau sei realiza iha loron kinta ,10/03/2022 iha postu administrativu Atabae munisípiu Bobonaru.
Jornalista : Abekha Raihusar
Editor : Agapito de Deus
