Vikeke, Lafaek News—Familia matebian hamutuk ho veteranus iha suku Afaloikai, postu-administrativu Watu-Carbau, munisípiu Vikeke selebra masakre Cara-Ulu ne’ebé akontese iha loron 24 Novembru tinan 1978, hodi hanoin hikas joven nain 13 ne’ebé oho husi militar Indonesia so’e iha debu laran Cara-Ulu Afaloikai.
Iha selebrasaun masakere Cara-ulu ne’e realiza iha loron segunda (22/11/2021) foin dadauk ne’e, no familia matebian no veteranus halibur malu iha debu Cara-Ulu ho mata-ween hodi hanoin hikas fali matebian sira.
Tuir familia matebian (Belarmino Fernandes), nu’udar mós feton Rita Fernandes, konta, iha momentu ne’eba militar Indonesia sira kaer nia maun lori sai husi uma no oho so’e iha bee debu Cara-Ulu.
“Ba kaer ha’u nia maun iha rai kalan lori sai mai baku tu-tuir dalan hodi lori mai oho tia mak so’e tun ba debu ne’e,” dehan familia matebian Rita Fernandes, ba lafaek news foin lalais ne’e.
Rita hatutan, nia maun (Belarmino Fernandes) husik hela nia oan nain 4 kompostu husi mane ida no feto tolu ho familia sira iha suku Loi-ulo, postu-administrativu Watu-karbau to’o ohin loron, no matebian ne’e mós nu’udar FALINTIL ida kuandu baze apoiu rahun.
“Ha’u nia maun mós FALINTIL, kuandu baze de apoiu rahun ami tun mai hela iha ami nia knua mak bapa sira mai kaer ha’u nia maun ba oho,” nia imforma.
Iha fatin hanesan veteranus “Sege lolo” hatete joven nain 13 mate ne’e kompostu husi Baguia Baucau nain 6, Watu-carbau nain 7, ema hirak ne’e la’os rende, maibé military Indonesia ba kaer kalan boot iha uma mak lori mai oho iha fatin refere.
“Ema hirak ne’e la’os rende, maibé bapa kaer kalan boot maka lori mai oho mate no so’e tun ba bee debu ida ne’e, tanba ne’e ita veteranus ne’ebé mak sei moris tenki tau responsabilidade ba sira hodi husu ba governu hare’e ba oan ki’ak ho feto faluk sira ne’ebé hela,” Sege Lolo rekomenda.
Entretantu partisipa selebrasaun masakre Cara-ulu, maioria husi familia matebian, veteranus, autoridade lokal, komunidade no joven inklui mós estudannte sira.
Jornalista : Abekha Rai-Husar
Asisten Editór : Pedro de Almeida
