Lafaek News—Mario da Silva Belo ho idade 35 husi munisípiu Baukau, postu-administrativu Baucau Vila, suku Trilolo, aldeia Osoala, husik nia oan nain haat ho feen kaben no familia sira iha Baukau mai faan livru iha sidade Dili hodi sustenta ba oan nia estudu no nesesidade uma laran.
Ha’u moris ho bisinis de’it, iha idade 19 ha’u fa’an ona skrim, depois to’o tinan hirak nia laran faan fali journal hotu tiha ha’u faan fali livru to’o ohin loron no ami nia moris maka ida ne’e los deit, laiha tan atividade seluk,” dehan negosiante Livru Mario da Silva Belo ba lafaeknews iha manleuana foin lalais ne’e.
Nia esplika, moris ne’e la’os fasil atu buat hotu-hotu iha de’it, se bainhira lakhoi buka, kuandu nesesidade uma laran obriga no hakarak oan susesu iha estudu importante xefe familia esforsu hodi sustenta, tan ne’e nia parte halo atividade negosiu.
Ha’u nia oan nain haat, ida maka sei tur iha eskola primaria no nain tolu sei ki’ik ho nia ama sira hela iha foho (Baucau), ha’u mesak iha Dili faan livru, bain-bain ha’u faan hahu tuku 9:00 dadersan to’o loraik, kuandu ema sosa livru menus ona ba entrega tiha osan, lori fali foun hodi kontinua faan,” nia esplika.
Rezidensia atual Mario da Silva Belo iha Lahane Oriental, iha ne’ebé hakat tun mai iha Dili laran faan livru nune’e bele hetan persen hodi haree ba nesesidade uma laran.
Livru sira ne’ebé ha’u faan la’os ha’u nia rasik, faan ema ema seluk nian, livru husi audian, kolmera dom bosco, iha loja nia presu $2.50 ha’u faan ba $3.00 para hetan persen, se loron ida ema sosa barak ha’u hetan persen $20.00, husi persen ne’e maka sustenta ba oan nia estudu no nesesidade uma laran,” tenik nia.
Husi atividade negosiu senti buat hotu kmaan maske la hetan rendimentu ne’ebé boot hanesan ema funsionariu sira, maibé bele responde ba nesesidade loron loron nian, ho ida ne’e nia parte rekomenda mos ba joven sira atu labele baruk ho atividade negosiu.
Maluk sira labele baruk ho atividade negosiu tantu faan produtu, obralan, livru no hirak ne’ebé la halo negosiu, ita tenke hanoin ona katak nesesidade obriga ita, ita moris iha dili buat hotu tenke osan, tanba ne’e labele hein deit maibé tenke buka rasik atu bele hetan osan,” informa.
Estratéjia Mario nian faan livru kaer de’it iha liman no balun fali iha pasta laran ne’e dala barak liu faan iha Largo, tasi tolu, manleu, taibesi no tama sai eskola tantu ensinu primaria to’o univesrsitariu sira iha Dili laran, No livru ne’ebé Mario da Silva Belo faan hanesan disionariu ingles no tetun, biblia no maioria inglesh.
Jornalista : Pedro de Almeida
Editór : Agapito de Deus
