Lafaek News—Yohanes Anunut ho idade 19, nu’udar estudante ida husi Eskola Sekundária Nicolao Lobato Tasi Tolu, segundu anu, jere nia tempu tomak faan pentolan hodi selu rasik nia eskola no sosa ekipamentus ne’ebé presija iha eskola inklui ajuda mós nesesidade familia uma laran.
“Pentolan kada kain ida $0.25, se ema sosa hotu pentolan ho manu tolun ha’u bele hetan $20.00 ba leten ne’e faan loron sorin de’it tanba eskola sai máka foin ba faan, hanesan kolega sira seluk faan loron tomak husi dader to’o loraik loron ida ha’u bele hetan $50.00 resin, ha’u faan ne’e osan ha’u rai hodi selu ba ha’u nia eskola antes ne’e ha’u nia familia mak selu ha’u nia eskola,” dehan Yohanes Anunut ba lafaeknews iha Manleuana segunda (15/11/2021).
Oe-kusi oan ne’e konta, esperensia faan pentolan ho manu tolun ne’e hetan husi nia kolega sira seluk ne’ebé faan uluk ba nia iha sidade Dili, bainhira hetan tiha esperensia ida ne’e nia hahú jere tempu parte dader ba eskola loraik faan pentolan, to’o ohin loron la depende ona ba inan-aman.
“Primeiru ha’u husu kolega sira ne’ebé faan pentolan oinsa atu faan, no sira esplika ba ha’u entaun ha’u hahú ho osan $ 20.00 hodi sosa pentolan ho manu tolun faan to’o ohin loron, husi ne’e ha’u mós ajuda fali sira iha nesesidade uma laran nian,” tenik nia.
Nia dehan, bain-bain dudu karosa ba faan pentolan iha area tasi-tolu no manleuana, maske la’o loron manas udan boot, maibé la sente kolen no baruk, tan ne’e máka moris, nune’e nafatin esforsu no vontade avansa ba oin.
“Dader ha’u ba eskola loraik tuku ida ha’u dudu pentolan hodi ba faan iha manleuana no tasi tolu,” hateten nia.
Enkauntu Yohanes Anunut oan husi Maria Elo no aman Mateus hela iha kampu baruh, nia iha maun alin hamutuk nain neen kompostu husi feto tolu no mane tolu, Yohanes nu’udar maun boot iha uma laran tanbe ne’e nia deside tenke faan pentolan nune’e bele ajuda fali inan-aman
Jornalista : Domingas Viana
Asisten Editór : Pedro de Almeida
