Lafaek News—Timorese English Club (Tienclub) servisu hamutuk ho GIZ, ohin kuarta (27/10), organiza workshop no halo abertura ba treinamentu kona ba lideransa, ko’alia iha públiku (public speaking) no abilidade komunikasaun durante loron sanulu resin lima ne’ebé sei organiza hosi Tienclub, ho objetivu atu empodera joven sira partisipa dezenvolvimentu sustentavel iha Timor-Leste.
Prezidente Tienclub, Marzenio Lopes, hatete, treinamentu ne’ebé sei akontese hahu iha loron 6 fulan Novembru tinan ne’e ba loron sanulu resin Lima, hetan apoiu finanseiru hosi GIZ/ Koperasaun Alemaña.
“Treinamentu ne’e sei fasilita hosi treinadór Tienclub no sei realiza iha Dili no konklui trade liu ona mak Dezembru tinan ne’e” dehan Prezidente Tienclub, Marzenio Lopes ba jornalista lafaek news hafoin remata workshop iha salaun JSMP, kuarta (27/10/2021).
Marzenio esplika, partisipante husi workshop no treinamentu sira ne’ebé atu mai kompostu husi estudante universitáriu, sekundariu no membru Tienclub rasik.
Treinamentu sira ne’e objetivu mak atu fanu no tane Joven sira hodi deskobre potensia hirak ne’ebé iha liuliu ba abilidade lideransa hodi sai ajente ba mudansa sosial iha Timor-Leste.
Autoridade Tienclub sublina tan, Timorese English Club hanesan grupu joven enerjetiku no volontariu Timoroan ne’ebé estabelese iha loron 21 fulan fevereiru 2020 ho objetivu atu akumula Joven potesial sira atu fahe abilidade ne’ebé sira iha liuhosi lingua English ba malu.
Nia relata, bainhira aktividade ne’e la’o durante iha Tienclub mak hanesan diskusaun semanal iha Jardin 5 de Maiu, fó kapasitasaun lingua English ba Joven sira iha kampung Alor no aktividade hamoos tasi ibun.
“Tienclub akumula ona Joven hamutuk 230 ne’ebé Mai hosi background edukazaun ne’ebé lahanesan maioria universidade no balun sekundariu,” tenik nia.
Iha sorin seluk, Advizór Juventude ba Mudansa GIZ Luisa Scholz hatete, ho inisitiva hakarak apoiu programa sira hanesan ne’e tanba GIZ iha programa ba partisipasaun Joven ba issu sosial sira.
“Bainhira Tienclub aprosima ami no hato’o sira nia idea ha’u la duvida no ami prontu atu suporta sira no ita sei haree progresu di’ak barak durante treinamentu ba loron 15 ohin mai,” tuir nia.
Nia dehan tan, kona-ba kontinuidade projetu ne’e sira seidauk deskute maibé karik Tienclub hakarak kontinua maka sira sei submete tan proposta ida hodi nune’e kontinua programa ne’e.
“Ami haree Tienclub organizasaun ne’ebé no ho estrutura ne’ebé forte tanba ne’e ami prontu nafatin atu suporta,” nia imforma.
Jornalista : Felisberto Fernandes
Asisten Editór: Pedro de Almeida
