Lafaek News–Primeiru Ministru Taur Matan Ruak hateten, ekonomia rai laran la’o di’ak depende ba reseitas husi mina, maibé uza la di’ak hatama hotu ba bolsu Timor Leste sei la ba oin.
Ita ohin loron ko’alia kona-ba reseitas, iha tinan barak ita depende ba petroliferu, no ita nia posu Bayu undan, ita nia estratejia di’ak mak defende difersifikasaun fontes rendimentu,’ dehan PM Taur iha nia Deskursu iha Aeroportu Kayrala Xanana Gusmão Kovalima, kuarta semana ne’e.
Xefe Governu ne’e informa, tinan barak ko’alia hurlele malu ho vizinu Austrália, más kuandu hadau malu ho greater sunrise Osan ne’e menus ba beibeik, entaun alternativa mak dadaun haree posu sira ne’e hodi fo kbiit nafatin dezenvolve nasaun.
Aleinde ne’e lori Governu nia naran no povu tomak, hato’o parabéns ba kompaña Timor Resources hodi halo prosesu tomak iha momentu istóriku ida ne’e.
Ha’u hakarak lori Governu no ita hotu nia naran fó saudasaun espesial ba Timor Resources no mós Timor-Gap kontra parte parseria dezenvolvimentu ita nia rekursu naturais iha ita nia rain, ohin ita testamuna momentu istóriku ida ne’e,” dehan PM Taur.
Entretantu, Timor Gap, mak Empreza Estatal nu’udar parseiru Joint Venture ho Timor Resource ho total asaun montante pursentu 50, hamutuk ho Timor Resources, Timor Gap hetan kontratu ba bloku explorasaun rua iha rai maran ne’ebé lokaliza iha Kosta Sul.
Iha kontratu PSC ho Governu Timor Leste, atraves husi ANPM, Kompania rua halo ona kompromissu atu halo perfurasaun ba posu 3, posu 2 iha Covalima no posu ida besik Betano, iha baliza entre Ainaro ho Manufahi.
Aliende iha lansamentu ne’e hetan akompañamentu husi Xefe Estadu Maior Jenerál F-FDTL, Tenente Jenerál Lere Anan Timur, Ministru Petroliu Minerais, Vise Ministru Estatal, Vise Xefe Estadu Maior F-FDTL, Major Jenerál Falur Rate La’ek, Brigadeiru Maunana, Sabika, Aluc no Coliati, Padre Paroku Suai Sebastião Correia, Autoridade Lokal, Administrador Munisipiu Covalima Franscisco de Andrade no Administrador Postu sira, Pedro Klamar Fuik, Embaixador Austrália, reprezentante Komandante Jeral PNTL, Superintendente Xefe Pedro Belo, Koronel Maubuti, Komandante PNTL Munisipiu Covalima no Ainaru, Vise Prezidente ANPM, Prezidente IPG, Jerasaun Patriota, Prezidente Konsellu Kombatentes Libertasaun Nasional Vidal de Jesus “Riak Leman” Veteranu sira husi munisipiu-12 no RAEOA, Lia Na’in.
Jornalista : Juvita dos Santos
Editór : Agapito de Deus
