Lafaek News–Komisaun Rekrutamentu (KR), Falintil Forsa–Defeza Timor-Leste (F-FDTL), ohin 15/09/2021 offisialmente publika naran kadetes (rekrutamentu) F-FDTL neebe liu ona iha teste atu bele mai inkopora iha instituisaun F-FDTL se mak la mai Komisaun sei ilimina konsidera lakon.
Xefe Estadu Forsa Armada Brigadeiro Jeneral Calisto Santos Coliati, Komisaun rekrutamentu husu joven feto ho mane iha teritoriu nasional ne’ebé tuir ona ezame médika, eskrita, orál no teste fízika iha sentru de instrusaun Nicolau Lobato Metinaru, bele hakbesik aan ba iha ida idak nia munisipiu hodi haree naran.
Tanba komisaun rekrutamentu F-FDTL sei lori lista ba taka iha fatin sira hanesan administrasaun munisipiu, Komandu PNTL, Komandu Munisipiu sira, no mos bele ba haree iha sede konsellu Veteranus nian.
Ohin ita publika ona rezultadu teste rekrutamentu nian hamutuk nain 600 mak liu ona teste, tan nee Kadetes neebe naran sai ka liu ona, tenke mai aprezenta aan imediata tuir munisipiu hodi rona orientasaun se mak la aprezenta aan iha loron neebe determina mak Komisaun rekrutamentu sei ilimina,” dehan Brigadeiro Jeneral Coliati ba jornalosta liu husi Komferensia Imprensa iha Kuarter Jeneral F-FDTL Fatuhada Dili, Kuarta 15/06/2021.
Coliati esplika, Munisipiu ne’ebé sei mai aprezenta aan iha loron Kuarta 22/09/2019 tuku 09:00am otl fatin Kuarter jeneral F-FDTL Fatuhada mak hanesan, Dili, Likisa Bobonaru, Ermera, Aileu, Manatutu no mos Baukau sira nee mak sei aprezenta uluk.
Loron kinta 23/09/2021 sira ne’ebé husi munisípiu Kovalima, Lautem, Vikeke, Manufahi, Ainaru no mos Oe-kusse inklui rezime espesial kandidatu ida-idak mak sei aprezenta aan iha loron segundu.
Kadetes sira mai aprezenta aan ho Objetivu atu rona orientasaun husi komisaun rekrutamentu nian, tan nee husu ba kadetes sira antes mai aprezenta aan tenke simu ona vasina primeira dozes tanba mai iha nee ita hotu tenke halo tuir regras no protokolu saude nian neebe governu fo sai ona,” Coliati Reforsa.
Nia Rekomenda, kadetes sira neebe sei hela iha munisipiu tenke mai ona iha Dili hodi hein data inkorporasaun ba iha sentru instrusaun metinaru, tanba data inkorporasaun nee sei realiza iha loron 27/09/2021.
Komisaun Rekrutamentu F-FDTL Husu nafatin ba kadetes ne’ebé la pasa iha teste ida nee, labele lakon vontade maibe nafatin kuidadu ita boot sira nia saude no mantein disiplina tanba tinan oin 2022 instituisaun F-FDTL sei halo tan rekrutamentu ba membru foun F-FDTL,” Coliati Sujere.
Entretantu Tuir dadus ne’ebé lafaek news asesu total kadetes ne’ebé liu ona iha teste hamutuk nain 600, feto porsentu 11 no mane porsentu 89, maibe antes ne’e ema nain 3.000 resin mak kompete iha rekrutamentu ne’e.
Jornalista : Orlando Magno
Editór : Agapito de Deus
