Lafaek News—Ekipa voluntáriu oferese nesesidade bazika ba kbiit laek kompostu husi uma kain rua hanesan faluk Ilda Mutubere, Miguel Amaral ho nia kaben Atina Soares, hili fatuk rahun no pineira rai-henek iha mota laran aldeia Lemkari iha periodu konfinamentu obrigatóriu hodi sustenta uma moris.
Hafoin media online lafaek news halo publikasaun notisia ho titulo ‘Rai Henek La Folin, Ilda Taka Liman Oratóriu no Loron Tolu Ona Foos Laiha,’ no mós ‘Miguel Moras Toba La Hader, Foos Iha Balde Laran Falta De’it Liman Isin Rua,’ iha aldeia Lemokari, suku Manleuana, postu-administrativu Dom Aleixo, Munisípiu Dili, iha ne’ebé konsege hetan tulun husi ekipa voluntáriu balu iha sidade Dili ne’e.
Ami akompania notisia husi lafaeknews konaba Tia (Ilda Mutubere) rona mos iha ne’e (Miguel Amaral), ami nain hira ekipa voluntariu mai fahe ai-han uituan atu augenta loron ida rua iha konfinamentu obrigatoriu nia laran,” dehan administradora ekipa voluntariu apoiu umanitaria, Olinda Fernandes Bareto ba lafaek news iha nia rezidensia manleuana, segunda (06/09/2021).
koordenadora ekipa voluntáriu apoiu umanitaria, Olinda Fernandes Barreto, hatete nia parte asesu notisia husi lafaek news kona-ba maluk kbiit laek sira, nune’e nia parte hola kedan inisiativa ajuda ai-han, maske la’os ho nia kuantidade boot, maibé bele responde ba maluk kbiit laek no vulneravel sira nia nesesidade ba loron ida rua nian.
Nia hatutan, asaun ida ne’e ekipa hetan apoiu husi maluk timor oan sira iha Makau no ema portuguesas sira buka fundus hodi fó ba ekipa voluntariu iha Timor, ekipa mos ho vontade husi pesoal ida-idak kontribui ba maluk sira ne’ebé presija tebes tulun.
Ami mos hetan ajuda husi maluk Timor oan balun iha Macau diaspora ne’eba, ema veteranus ida naran Sakoko hamutuk ho ami maka hala’o apoiu umanitariu ida ne’e,” Informa Olinda.
Enkuantu reprezenta familia uma kain rua, faluk Ilda Mututbere, hato’o agradese boot ba ekipa voluntariu sira ne’ebé ajuda ona hahan ba sira iha situasaun defisil ne’e.
Ha’u agardese boot tebes ba oan sira no maluk sira ne’ebé mai ajuda ona ami, maske lafamilia maibé maromak boot ohin loron tulun duni ami,” hatete Faluk Ilda Mutubere.
Entretantu nesesidade baziku ne’ebé oferese husi ekipa voluntariu maka hanesan foos, supermie, mantolun, mina, rinso, sabaun inklui sasan sira seluk.
Jornalista : Pedro de Almeida
Editór : Agapito de Deus
