Lafaek News–Estudante sétimu ano Eskola Bázika III sekulu Sergio Veira de Melo, Aisha de Castro, sente triste ho desizaun governu suspende eskola iha territoriu nasional, loro-loron utiliza tempu eskola nian hodi faan tomate haleu merkadu Taibessi.
Eskola laiha ami sente triste, tanba materia mos laiha entaun durante ne’e mestri sira dehan ami sei kikoan ne’e labele kaer telefone laiha zoom, tanba dehan imi kiik oan ne’e lalika iha klass online tanba ami la hatene book telefone, eskola laiha ami sente triste tanba material mos ita la tuir tan,’’ katak estudante sétimu ano ne’e ba lafaek news iha merkadu Taibessi foin lalais ne’e.
Estudante husi eskola Sergio Veira ne’e, la’o haleu merkadu Taibessi ho hatais simples atu proteze an husi manas, hatais sinelus kor-mean, faru sakat kalilin ho kor mutin, liman karuk-loos hiit plástiku mutin ne’ebé enxe ho tomate ne’ebé kada pakote ho presu sentavus 0,25, husi dader too lokraik hetan dolar 4 to 5.
Atividade negósiu ne’e nia (Aica) faan iha tempu dader too lokraik, maibé la’os ninian rasik, faan tutan ema nian, nune’e too lokraik selu ho dolar 1 ba estudante husi Sergio Veira de Melo ne’e.
Tomate ne’ebé ha’u faan ne’e ema nian mak ha’u faan no plástiku ida 0,25 sentavus entaun loron ida ami hetan dolar 4 ou 5 de’it, ami faan tomate ne’e plástiku barak, maibé ema hola dolar 4 entaun ema selu ami dolar 1 se loron ida mak ha’u hetan dolar 8 entaun sira selu ha’u dolar 2,” hateten Aisha de Castro.
Aisha orijen husi munisipiu Baukau Laga Sagadate, inan-aman devorsidu, aman kaben ho feto kiik, no inan kaben ho mane seluk, Aisha decide hamutuk ho nia inan hodi aproveita eskola no ajuda buka osan hodi sustenta nesesidade uma laran.
Ha’u agora hela ho ama boot, karik ha’u presiza osan ne’e ha’u husu vizinu sira nia telefone hodi telefoni ha’u nia ama lori osan se osan la to ha’u tenke esforsu an hodi fan tomate selu eskola no osan selu bemo nian,’ agora ama iha baucau no halo toos entaun hau mai hela ho ama boot hodi eskola iha nee,no ama boot mos fan tomatu hanesan hau ,ama boot hola mane ema same no oan nain 8,no nia katuas oan la serbisu ida. Hau uluk SD eskola iha foho maibe hau nia apa mate tiha entaun hau nia abo sira haruka hau mai hela ho ama boot, ha’u faan tomate osan ne’ebe ha’u hetan ne’e ha’u tabun atu nune’e situaaun SS hotu eskola loke fali ha’u bele uza hodi selu bemo ba eskola, keta tama mak kopia iha karik ami bele, ha’u la husu ama boot tanba ama boot mos oan barak tan ,hela ho ama boot mos siak hela deit ne’e,” Haktuir Aisha.
Estajiada : Cresencia Ferreira
Editór : Agapito de Deus
