Lafaek News–Prezidente Republika Francisco Guterres Lu Olo, segunda (06/09/2021), ofisialmente promulga no altera dahuluk lei resensiamentu eleitoral hodia mellora sistema resensiamentu ne’e liu husi teknolojia atu loke dalan identifika kada eleitoral.
Tuir preámbulu hato’o husi Parlamentu Nasional, alterasaun dahuluk ba Lei Resenseamentu Eleitoral halo hodi hadi’ak sistema resenseamentu eleitorál liuhusi teknolojia no inovasaun ne’ebé loke dalan atu identifika di’ak liu kada eleitór, ho risku erru ne’ebé ki’ik tebes,” Dehan Presidente Repúblika Fransisco Guterres Lu_Olo liu husi komunikandu ne’ebe mak Jornalista asesu husi Media PR iha loron segunda 06/09/2021.
Xefe Estadu ne’e afirma, aleinde impresaun dijital, sei identifika eleitór ida-idak bazeia ba ninia karaterístika fízika (dadus biométrikus), kada eleitór sei iha mós “chip” eletróniku ho informasaun hotu-hotu kona-ba titular kartaun, mai kedas ho mekanizmu seguransa ne’ebé garante katak sei la viola identidade eleitór nian.
Lei ne’e promulga, iha sexta-feira kotuk, alterasaun dahuluk ba Lei Resenseamentu Eleitoral tanba Dekretu foun ne’e haktuir ona Konstituisaun RDTL, Dekretu ida uluk, aprovadu iha 28 juñu 2021, husi PN Prezidénsia Repúblika simu iha 6 jullu 2021, iha artigu balun ne’ebé PR konsidera la haktuir Konstituisaun RDTL no tanba razaun ne’e mak haruka ba Tribunal Rekursu atu tetu no foti desizaun,” katak PR Lu Olo.
Tanba Akórdaun husi Tribunal Rekursu mak konsidera artigu 17, númeru 2 inkonstitusionál mak PR tenke foti desizaun veta dekretu ne’e no haruka fila ba Parlamentu Nasional, iha 9 agostu 2021, akompaña ho kópia Akórdaun nian.
PN halo fali apresiasaun ba Dekretu vetadu husi PR no deside hasai tiha artigu 17, númeru 2) no haruka mai PR iha 31 agostu 2021, tamba la iha ona inkonstitusionalidade, PR promulga, iha 3 setembru 2021, dekretu PN ho númeru 43/V”, hakotu Lu_Olo liu husi Media PR seguda ne’e.
Jornalista : Rita Moniz
Editór : Agapito de Deus
