Lafaek News–Governu liu husi Konsellu Ministru (KM) deside atu impoin serka sanitária iha Munisípiu Manufahi, hahú husi loron 2 fulan-setembru to’o loron 15 fulan-setembru tinan 2021.
Ministru Prezidénsia no Konsellu Ministru (MPKM), Fidelis Manuel Leite Magalhães hateten, bandu ema atu tama no sai husi munisípiu ne’e, exetu tanba siguransa públika, saúde públika, asisténsia umanitária, manutensaun sistema abastesimentu públiku ka realizasaun interese públiku.
“Proibisaun hirak ne’e la abranje ba ema hirak ne’ebé maka komprova ona vasinasaun kompleta (doze rua) kontra COVID-19, nune’e mós ba labarik ki’ik sira ho idade tinan neen mai-kraik ne’ebé akompaña ema sira ne’e,” dehan Fidelis ba Jornalista hafoin remata enkontru KM iha Auditórium Aitarak-Laran Dili, (01/09/21).
Enkuantu Serka sanitária sira-seluk ne’ebé sei vigora hela, la sofre alterasaun saida de’it.
Jornalista : Juvita dos Santos
Ediór : Agapito de Deus
