Lafaek News–Diretor Jerál Servisu Migrasaun (SM), Superintendente Asistente Polísia, Luis Soares Barreto informa, Servisu Migrasaun (SM), aplika ona multa ba sidadaun ne’ebé hakat fronteira liu husi dalan ilegal iha semana rua ba kotuk.
Luis Barreto deklara, sidadaun Timor-oan nain 26 ne’e, kompleta ona loron 14 iha kuarentena munisípiu Kovalima, tanba hakat liu dalan ilegal (jalan tikus) liu husi fronteira terrestre, tanba ne’e ohin servisu migrasaun (SM halo invetigasaun ba sidadaun sira hodi aplika kedan multa.
“Ohin ita nia ekipa halo ona investigasaun no aplika multa osan $.250.00 ba ema ne’ebé tama sai fronteira la iha razaun no ba sira neebe halo negósiu illegal ita aplika $.30.00 “, dehan DJSM Luis Barreto ba jornalista via telefone , sesta (27/08/2021).
Nia esplika, hafoin parte Imigrasaun konklui prosesu administrasaun multas hotu sei entrega ba iha PNTL parte Investigasaun Nasionál hodi prosesu kontinuasaun ba Ministériu Públiku, maibé sidadaun sira nee agora sei iha hela kuarantena sei aplika sansaun ne’ebé hanesan.
Dadus iha fulan Agustu 2021, sidadaun sira ne’ebe tama sai fronteira husi dalan ilegal hamutuk 629 inklui ho sira ne’ebe autoridade seguransa husi Indonesia entrega ba Unidade Patrollamentu Fronteira.
Jornalista : Orlando Magno
Editór : Agapito de Deus
