Lafaeknews–Portavoz Arte Moris, Luna Caminha, rejeita ho fatin ne’ebé governu oferese iha armajen Bebora tanba la sufisiente ba atividade arte moris , husu Ministeriu Justisa (MJ) tetu atu labele kuda diskriminasaun.
Luna Caminha hatoo asuntu ne’e iha konferensia imprensa, sesta (20/08/2021), iha edefisiu Arte Moris Komoro postu administrativu Dom Aleixo munisipiu Dili.
‘‘Ami rejeita ho fatin ne’ebé governu oferese iha armajen Bebora nian tanba fatin la sufisiente atu hala’o atividade arte moris nian, nune’e husu ba Ministériu Justisa la bele kria diskriminasaun entre Arte Moris ho Konsellu Kombatente Libertasaun Nasionál,’’ afirma Portavoz Arte Moris ne’e.
Nia hatete, Iha momentu ne’ebá Sekretáriu Estadu Terras Propriedade indentifika duni fatin ne’e ba Arte-Moris, maibé haree de’it seidauk hili atu Arte-Moris simu fatin ne’e.
“Ami husi grupu Arte-Moris husu ba MJ konsidera ami-nia ezistensia no kontribuisaun durante tinan 18 liu iha fatin ne’e hodi la viola sira-nia ne’ebé haktuir ona iha lei nu. 8/2017,” katak Luna.
Diretór Arte-Moris, Iliwatu Danapere reforsa tan, bainhira haree fatin ne’e la natoon atu akumula grupu Arte-Moris ne’ebé halibur hamutuk no envariomentu haleu la favorabel atu kontinua atividade tanba uma komunidade besik inklui rate balun mós iha.
“Bainhira ami haree fatin ne’e la naton atu akumula grupu arte moris ne’ebé halibur hamutuk no envariomentu haleu la favorabel atu kontinua atividade tanba uma komunidade besik inklui rate balun mós iha,” Deklara nia.
Iha fatin hanesan Reprezentante NGO Rede ba Rai, Elias Godinho hatete, KKLN atu okupa fatin ne’e aktu hotu tenke submete ba lei proriasaun iha artigu 8 no KKLN tenke mai ho prinsipiu ida ema katak, hasai ema ida husi fatin ida ba fatin seluk minimu nia moris ne’e tenke hanesan ho moris anterior ou di’ak liu no la bele pior fali husi ne’e.
“Ha’u husu KKLN atu okupa fatin ida ne’e aktu hotu tenke sunjetu ba lei proriasaun iha artigu 8 no KKLN tenke mai ho prinsipiu ida ema katak, hasai ema ida husi fatin ida ba fatin seluk minimu nia moris ne’e tenke hanesan ho moris anterior ou di’ak liu no labele pior fali husi ne’e,’’ Elias hakotu.
Jornalista : Rita Moniz
Editor : Agapito de Deus
