Lafaek News–Diretor Ajensia Empregu Entrega Ba (AEEB), Julio Barros informa, halo ona karidade ba familia kbiit laek Raul da Costa ho nia kaben ne’ebe enfrenta hela krize nesesidade uma laran.
Julio Barros espresa, iha nia parte sente triste bainhira lee notisia Lafaek News ne’ebe ko’alia kona-ba avo Raul nia realidade, bainhira lee notisia soke tebes fuan hodi buka tuir familia kbiit laek ne’e hodi fo ajuda.
“Ami haree no lee Lafaek News nia notisia ne’e, sente susar tebes entaun ami husi ekipa AEEB lori nesesidade bazika mai haree direta avo Raul ho nia familia, atu hakmaan sira nia terus. maibe ami la’os ema riku mak apoiu Avo ho familia,”dehan Diretor AEEB Julio ba Lafaek News iha Moris Foun Dili, sesta 13/08/2021.
Apoiante kbiit laek ne’e haktuir, Ajensia Empregu Entraga Ba (AEEB), nudar empreza sosial iha Timor ho misaun atu ajuda Timor-oan ne’ebe hetan ona servisu iha rai laran.
“”Halo solidariedade ida nee, sei partense ba ami nia atividade empreza sosial entaun ohin ami mai lori, foos kg 25 saku 4, Sedaap dos 4, mina litru 5 masa 1, no mos nesesidade sira seluk,” Julio relata.
Iha fatin hanesan kbiit laek Raul da Costa relata, iha nia parte sente di’ak uituan bainhira iha ema laran di’k ajuda nia iha tempu susar-laran.
“Agora ha’u sente fuan naroman uituan ona tanba ami nia fos mos hotu ema ajuda ami tanba nee obrigado ba Ekipa neebe ajuda ona ha’u no mos obrigadu ba Jornalista Lafaek news ne’ebe bele mai too ha’u nia uma hodi haree direta ha’u nia realidade moris,” kbiit laek Raul ko’alia ba Jornalista lafaek news ho lian Bunak.
Nia haktuir, maske hetan ona ajudus balu husi ema laran luak, maibe nia sente fuan seidauk hakmatek tanba uma ne’ebe nia hela la sufisiente ba Avo Raul ho nia familia atu deskansa iha kalan.
“Ha’u nia laran la hakmatek loos bainhira ha’u hela de’it iha uma hanesan ne’e karik udan mai ha’u atu halai ba ne’ebe agora kondisaun uma mos seidauk di’ak no uma ida agora iha hari ne’e mak atu kontinua mos osan laiha,” nia hakotu.
Jornalista :Orlando Magno/Domingas Viana
Editor : Agapito de Deus
