Lafaek News—Primeiru Ministru (PM) Taur Matan Ruak, afirma, gastu osan barak ba infra-estrutura hanesan konstrusaun edifisiu foun Tribunal Rekursu no Tribunal Distrital Dili importante máka garante nia kualidade.
“Esforsu hodi dezemvolve infra-estrutura iha futuru ho kualidade ne’e importante lo’os, tanba ita gasta osan barak ita mós hakarak uza, sei ita gasta osan depois estraga de’it no ita la uza iha tempu naruk ne’e ita dehan so’e masin ba tasi laran,” dehan PM Taur Matan Ruak ba jornalista sira hafoin visita edifisiu foun Tribunal Rekursu no Tribunal Distrital Dili, kaikoli, Sexta (13/08/2021).
Ruak dehan, apresia ho presidente tribunal rekursu ho nia ekipa kontrator no konsultan sira nia servisu kualidade, tanba ita halo obras barak iha Timor-Leste, espera tinan oin bele remata ona.
“Ha’u apresia lo’os ba prezidente tribunal rekursu no nia ekipa konsultan no kontrator, traballador sira nia esforsu atu hatudu katak ita mós bele, ba ha’u importante liu mak kualidade, ita bo’ot sira hare’e situasaun ohin loron Covid-19 halo ita difikulta atividade, kontrator no traballador sira nia atividade barak, maibé importante liu mak asegura konstrusaun ne’e nia kualidade,” Ruak Imforma.
Nune’e Taur dehan, hanesan ita hotu hatene katak estadu de direitu demokratiku ne’e nia pilar bo’ot ida máka setor justisa, tan ne’e tenke tau matan.
“Setor justisa, tribunal sira ita la tau matan ne’e ita koalia estadu de direitu demokratiku mais hanesan ema dehan ita halimar. Entaun ita fó fatin no hari’i infraestrutura, prepara ita nia kuadru sira teknolojia ne’ebé di’ak nune’e sira konfortavel servisu hodi konsentra ba tau lialo’os liuliu bainhira sidadaun sira buka lialo’os,” hatete Primeiru Ministru.
Entretantu konstrusaun edifisiu foun Tribunal Rekursu no Tribunal Distrital Dili ne’e, konstrui husi kompañia China Shandong International Economic ho Technical Cooperation Group, valor osan kontratu/ Contract Value $10, 990, 769.35, ho nia durasaun tempu ba kontrusaun ne’e hahu husi 12 de outubru 2020 to’o 6 de marsu 2022.
Jornalista Estajiadu : Hermenegildo Bubun
Asisten Editór : Pedro de Almeida
