Hakerek Na’in   : Natalino Barros (Kalisubun)

Departamentu : Konservasaun Rekursus Naturais

Fakuldade        : Teknolojia Agrikultura

Alumi               : Universidade da Paz

Loron 12/08/2021, Hakerek na’in atu subliña de’it katak, ema matenek sira mak halo lei pensaun vitalisa no matenek sira babain halo korupsaun depois halai ba rai liur.

Ema matenek sira babain moras ba konsulta iha Sigapura, ema matenek sira mak hetan osan perdiam, osan pulsa no karreta estadu nian.

Ema matenek sira mak biasa bosok povu iha tempu kampaña. Nune’e povo fó fiar hodi bele ka’er ukun/podér, depois ka’er ukun/podér ema matenek sira goza priveléjiu ho nia grupu sira.

Hehehe la’os de’it ida agora biabliza governu ne’e, hotu-hotu ne’ebé ka’er ona ukun hanesan de’it, konsekuénsia lójika ho anka bele hatete 1×1=1, semuanya sama saija intinya, lider polítika no partidu polítika eh ema matenek sira iha Timor ne’e la’os ukun tanba povo nia moris di’ak, Maibé tanba pozisaun no osan depois para bele sai riku (hetan estrata sosiál iha sosiedade).

Hare’e husu sorin seluk, sira ne’ebé lidera iha partidu polítika sira ne’e mesak ema sira ne’ebé uluk luta ba libertasaun pátria, no sira haluha eh finje ba prinsípiu no objetivu luta ba libertasaun povu. De faktu hatudu momos lubuk oan ida mak goja rikusoin komún (povu nian rikusoin).

Matenek no la matenek mak ukun povu ida ne’e, importante iha onestidade, sabedoria, transparansia, integridade, progresivu, espíritu voluntariu no espíritu revolusionariu hodi bele luta ba interese komún. Aumenta husi (Leo Soares).

Matenek no la matenek mak ka’er ukun/podér importante tenki tane a’as valór no dignidade ema ni’an tenke hanesan, liu husi  jere rikusoin komún tenki hanesan ba ema hotu, edukasaun tenke hanesan ba ema hotu, saúde tenke hanesan ba ema hotu no seitor sira seluk tenke hanesan ba ema hotu. Iha estadu eh nasaun ida, kuandu ema iha valór no dignidade hanesan wainhira ema hotu-hotu moris dignu ka moris hanesan/iguál husi rikusoin komún. No la iha ema ida ka grupo ruma mak goza mesak rikusoin komún, to’o la fó valor no haluha dignidade povo ni’an ne’ebé sei moris ki’ak no terus.

Matenek la iha prinsípiu luta ida ba komún nia moris di’ak mak matenek sei hamosu de’it explorasaun ba rikusoin komún no esplorasaun ema ba ema.