Lafaek News—Ministériu Edukasaun Juventude no Desportu (MEJD) hamutuk ho parseiru Embaixadora Australia iha Timor Leste distribui materia rezumu no kaderneta escolar hodi fasilita estudante seklu datolu.
Tuir MEJD, Armindo Maia hateten, objetivu husi serimonia ne’e oinsa bele halo distribuisaun materia rezumu sira nomós kaderneta eskola hodi bele fasilita estudante sira iha primeiru, segundu no terseiru sekulu, atu nunee sira bele hala’o Ensinu aprendisazem ne’ebé efetivu.
“Ha’u kontente tebes ohin dader ita bele mai partisipa iha serimonia ne’ebé simples, maibé ho ninia signifikadu ne’ebé boot tebes no ita bele distribuisaun materia rezumu sira ne’e nomós kaderneta eskolar bele fasilita estudante sira primeiru, segundu no terseiru sekulu atu nunee sira bele hala’o Ensinu aprendisazem ne’ebé bele efetivu,” dehan Armindo Maia ba jornalista iha sentru empresaun Komoro Sesta (13/08/2021).
Governante ne’e salienta, estudante sira barak liu mak la iha manual, entaun profesor sira empresta de’it atu estudante sira bele akompnha iha aula laran, maibé oras hotu estudante sira tenki entrega fila fali.
“Ita espera katak iha 2022 no 2023 ita bele tau osan atu bele produs manual ba labarik ida-idak bele iha livru hodi fila ba uma bele estudante,” informa Ministu Edukasaun Armindo.
Nia hatutan, iha pandemia Covid-19 sai dezafiu bo’ot, tanba serka sanitaria no konfinamentu obrigatoriu, maibé oportunidade ba dezenvolve atividade kona-ba ensinu distansia ne’ebé ema hotu hare’e katak iha limitasaun ne’ebé ema hotu esprementa.
“Ita hotu-hotu hatene katak pandemia Covid-19 sai dezafiu bo’ot ida ba ita hotu, tanba serka saniaria no konfinamentu obrigatoriu, maibé oportunidade ba ita atu dezenvolve atividade kona-ba ensinu distansia, no ita hotu mós hare’e katak iha limitasaun ne’ebé ita hotu esprementa kona-ba prosesu ensinu distansia la iha asesu ba rede internet osan la iha,” hateten Armindo.
Iha fatin hanesan Deputi Embaixadora Australia iha Timor-Leste Suzi Wilson hatutan, durante pandemia Covid-19 iha impaktu ne’ebé bo’ot tebes liu-liu ba estudante sira tamba ho Estadu Emerjensia no serka sanitaria eskola sira taka hotu no hala’o Ensinu aprendisazem liuhusi linha online.
“Razaun ida ne’e mak embaixada Australia kontente tebes bele apoiu MEJD hodi prepara materia rezumu sira atu bele distribui ba eskola ensinu baziku sekulu datolu Espera katak materia rezumu sira ne’e bele ajuda hodi fasilita estudante sira hodi bele prepara an ba ezame Nasional ne’ebé sei hala’o iha tempu besik”, dehan Embaixadora.
Aleinde ne’e, Australia mós apoiu MEJD hodi halo impresaun kaderneta ba eskola Ensinu baziku sikulu datolu nian. No Governu Australia mos iha komitmentu nafatin atu apoiu MEJD hodi hadia edukasaun ba estudante sira iha Timor Leste.
Jornalista : Sonia de Almeida
Asisten Editór : Pedro de Almeida
