Lafaek News–Prezidente Republika, Francisco Guterres Lu Olo, sesta (13/08/2021), fo toma de pose ba embaixadór nain 4 ba nassau 4 kompostu husi Korea, do Sul, Vietnam, CPLP no Zeneva ka Sueisa husu tenke iha koñesimentu ne’ebé klean iha área multilaterál.
Xefe Estadu hatoo asuntu ne’e hafoin fo pose ba embaixadór Timor-oan nain hat hanesan Grigorio Sousa ba Korea do Sul, Maria Olandina Cairo ba, Vietname, Marina Ribeiro Alkatiri ba CPLP, Lourdes Bessa ba Zeneva e paizes Sueisa, iha salaun Xina palasiu prezidente republika Bairu-Pite Dili.
“Ho onra mak ha’u prezide serimónia tomada de posse ba Exelénsia sira nu’udar embaixador foun ba ita-nia País,Ita-Boot sira sei hala’o knaar iha ámbitu bilaterál no multilaterál,” Dehan Xefe Estadu Francisco Guterres Lu Olo.
No husu embaixadores sira ne’ebe simu pose ohin, nain rua sei asumi funsaun iha Ázia, embaixadora ida iha área bilaterál no multilaterál no embaixadora ida seluk iha ámbitu multilaterál.
“Ita-nia Estadu nia polítika esterna lao tuir prinsípius no valores ne’ebé define iha ita-nia Konstituisaun no, iha kuadru ida ne’e, mak ita haree ba interese nasionál Timor-Leste nian, no hatán loloos ba nesesidades País nian,” Dehan Xefe estadu.
Haree ba dezafiu sira ne’ebé Timor-Leste hasoru dadaun, embaixador sira tenke iha koñesimentu ida ne’ebé klean iha área multilaterál no hatene oinsá dada liután investimentu husi rai-li’ur atu ajuda haburas liután ekonomia Timor Leste.
Iha fatin hanesan, imposada Maria Olandina Cairo Alves nudar Embaixadora Timor Leste ba Vietname hateten, bainhira simu kna’ar ida la’os hanesan previleziu ida, maibe responsabilidade ne’ebe estadu Timor Leste hakarak fo.
“Bainhira ita simu kna’ar ida ba ha’u laos hanesan previleziu ida mai ha’u, maibe responsabilidade ida ne’ebe estadu Timor leste hakarak fo mai ha’u, enkuantu ha’u sei bele, ha’u nudar sidadaun ida Timorleste enkuantu ha’u sei bele halo buat ruma ha’u sei halo,” katak imposada embaixadora Timor Leste ba Vietname ne’e.
Jornalista : Rita Moniz
Editor : Agapito de Deus
