LafaekNews—Sekretariu Estadu Arte no Kultura (SEAK), ho Ministériu Ensinu Superior Siensia no Kultura (MESSK), ofisialmente lansa programa politiku prezervasaun patrimóniu kultural, no sei apoiu uma-lulik 42, grupu industria kriativus kulturais 13 inklui grupu kultural komunitaria.
Sekretariu Estadu Arte no Kultura (SEAK) Teofilo Caldas, hatete, SEAK hamutuk ho MESSK hodi implementa programa oitavu governu konstitusionál ne’ebé ko’alia kona-ba politiku preservasaun patrimoniu kultural.
“Uma lulik mak sentru kultural ne’ebé halibur jerasaun ba jerasaun hanesan mós muzeu tradisionál ne’ebé konsentra ita nia patrimoniu kultural,” dehan SEAK Teofilo Caldas ba jornalista sira iha edifisiu SEAK, Pantay kelapa, sesta (09/07/2021).
Nia hatutan, benefisiaria iha primeira fase ne’ebé máka governu atu apoiu máka uma-lulik hamutuk 42, grupu kultural 13 inklui grupu kultural komunitaria.
“Orsamentu ba primeira faze hamutuk $128 mil ne’ebé mak ita sei fó apoiu ba grupu benefisiariu sira uma lulik nomós industria kreativus kulturais,” tenik SEAK.
Iha fatin hanesan, Lia nain Jeraldo do Santos, reprezenta husi munisípiu Baucau, postu-administrativu Kelikai Suku Abu Aldeia Da’e-mena, dehan, uma lisan ne’ebé hari’i husi beiala sira no hetan estragus iha tempu Indonesai, maibé agora hetan ona apoiu sei hadia hotu.
“Ami hetan ajuda husi SEAK, tamba ne’e Ami husi uma lisan Lari-Isi Bua-Falu ami oan no bei-oan Lari-Isi konsentra malu hodi harii fila fali uma lisan,” informa Lia na’in Jeraldo.
Entretantu, partisipante iha lansamentu prezervasaun patrimoniu kultural ne’e husi, Sekretariu Estadu Arte no Kultura (SEAK) Teofilo Caldas, Ministeriu Ensinu Superior Siensia no Kultura (MESSK) Longuinhos dos Santos, inklui lian nain husi munisípiu hotu-hotu.
Jornalista : Sonia de Almeida
Asisten Editór : Pedro de Almeida
